Thursday, October 17

Bisi: Pemutus Kot mandangka orang luar enda tau sengapa ngempu tanah NCR

0

KUCHING: Seiku orang dagang Bisi Jinggot @ Hilarion Bisi Jenggut bedau putus penemu taja pan pemutus Kot Perintah Besai empai lama ke udah ke enda ngemendarka iya ngempu Tanah Adat Bansa Asal (NCR) di Sungai Agas, Matang ditu.

Lebuh dikerandau The Borneo Post kemari ba opis iya di King Centre Commercial Complex, Bisi kering penemu madah, ‘Pemenang enda kala ngetu sereta orang ke lari enda kala menang’.

Sebanaka undang-undang ke enda nyemetak pasal tanah NCR di nengeri tu, iya madah pemutus kot kena 11 Julai tu tadi ke enda miak ke iya ketegal undang-undang tanah NCR di nengeri tu ke kurang nyemetak.

Ukai nya aja, mayuh undang-undang udah berubah nitihka ubah dunya, sebaka mega dulu kelia enti lelaki Iban deka bebini dia iya patut udah bisi bedengahka munsuh tang nya udah punas diatu, ku iya.

“Iban dulu kelia, enti nadai bedengah pala, dia iya enda teulihka bini. Nadai indu deka jadi enggau iya laban dikelai penakut,” tandu iya.

Indah dalam adat bansa Iban, ‘Tungkus Asi’ mega dikelala lebuh maya sida besilih tanah lalu nya mega pelasar kot ngatur penyarut pasal tanah.

Iya mega berasai enda puas ati taja pan mayuh peranak menua bulih degree nyadi luyar tang nadai pan didinga sida udah ngemanah tauka nyerenih undang-undang ari aki ini sida menya.

“Ba aku adat lama tu, balat charut sereta mar dipereti lalu patut bendar diserenih ngambika semua bansa asal ulih ngeluarka diri ari kena chekak adat nya.

“Iya ke bendar, bisi 242.41 ika tanah ke diempu 20 iku pengempu tanah NCR ke charut di Matang nyengkaum enggi aku urung 120.33 ika llu ari nya bisi 37.24 ika diambu Superintenden Opis Tanah enggau Survei Pelilih Kuching sereta diberi ngagai Lembaga Amanah Kebajikan Darul Falah,”ku iya.

Ku iya, tanah nya diempu Iban ba kandang menua nya tang nama sida dipadam ari pelin Opis Tanah enggau Survei Pelilih Kuching enggau nadai penmendar.

Lebih ngalitka ati kitai, tanah mix zone ke dia ba Lots 85 & 86, Block 1, Matang Land District diempu Lembaga Amanah Kebajikan Darul Falah.

“Nitih pemendar, aku balat alit penemu ngenang pemutus kot. Semua tanah nya dibeli aku ngena duit ari titik peluh aku,” ku iya.

“Taja pia aku enda putus pengarap lalu deka ngelaban ngena undang-undang laban kes tu dipeda aku empai datai ba pengujung.

“Enggau tu mega aku nesau semua bansa Dayak ke ngempu tanah NCR nuntut pulai tanah sida ke udah dibeli orang luar ngambi pulai tanah sida berindik ari semua semaya nya enda betul nitihka undang-undang,” ku iya.

“Ba aku pemutus Kot Perintah Besai tu tadi bisi gaya miak ke bansa Dayak. Abis nadai pan kitai nemu nadai orang luar tau sengapa ngerampas tanah NCR kitai,” tandu iya.