Sebengkah kompeni udah diberi tanggungpengawa bejalaika pansik silik pasal penanggul sistem nya
MINTA PERATI: Irwan (dua kiba) nerima memorandum ari pengari Persatuan Pengilang Bumiputera Sarawak, seraya dikemataka Yahya (kiba). — Gambar Kong Jun Liung
KUCHING: Penanggul bekal karan tauka elekterik ti tejanggal di nengeri tu deka ditemu dalam timpuh dua bulan ari diatu.
Ketuai Sekretari Wang, Opis Menteri Wang Malaysia, Tan Sri Dr. Mohd Irwan Serigar Abdullah madah, nya berindik ari sebengkah konsultan ke ditumbuh ti diberi tanggungpengawa bejalaika pansik silik bekaul enggau penanggul karan di Sarawak.
Dalam aum pengarang berita kemari, iya madah, sebengkah aum deka diatur begulai enggau piak konsultan, Sarawak Energy Berhad (SEB) enggau Sarawak Hidro Sdn Bhd di Kuala Lumpur seharitu.
“Kitai udah milih sebengkah kompeni konsultan iya nya Poyry Energy Sdn Bhd ti bejalaika pengawa pemansik pasal penanggul sistem bekal karan sekalika bepun ari Bakun tauka ketegal sistem penyadung enggau bedua, ngambika nadai penanggul ke sebaka nyadi di nengeri tu jemah ila lebih agi di kandang mengeri Kuching.
“Aku empu nyadi chairman aum nya pagila (seharitu) di Kuala Lumpur, dia sida ari SEB, Sarawak Hidro enggau piak konsultan deka mantai sereta bejuraika nama asil ke dulu ditemu sida ngagai aku dikena ngenegapka agi sistem bekal karan di nengeri tu.
“Ke bendar, kitai udah numbuhka konsultan dua bulan ti udah, sebedau penanggul bekal karan ti tejanggal lalu asil iya deka ditemu dalam timpuh dua bulan agi,” ku iya.
Dulu ari nya Irwan bejadi sereta nyadi chairman Majlis Konsultasi Bajet 2014 ti diatur ba sebengkah hotel ditu, kemari.
Iya ti ngenang pekara nya berindik ari penusah bekal karan ti tejanggal di nengeri tu apin lama.
Penanggul bekal karan ti nyauka mungkur serata Sarawak nyadi kena 27 Jun 2013 urung jam 5.36 lemai, ketegal pengeruga ba stesyen penyadung di Kemena-Bintulu.
Nyerumba aum pengarang berita nya kemari, Irwan nerima memorandum ari Dewan Usahawan Bumiputera Sarawak (DUBS), Persatuan Pengilang Bumiputera Sarawak enggau Dewan Usahawan Industri Desa Sarawak.
Sama bisi ngulu aum pengarang berita nya kemari, Sekretari Perintah Besai Sarawak Datuk Md. Yahya Basimin sereta ke bukai.