Willie Mongin ngining Bengoh ba PRN 2016

0

KUCHING: Willie Mongin (gambar) ari Parti Keadilan Rakyat (PKR) diatu benung ngirai diri laban deka bediri nyadi chalun maya Pengawa Bepilih Nengeri (PRN) ke diperambu diatur ba taun 2016.

“Minta kasih ngagai Petara, aku deka bediri enti nerima pemendar ari ketuai tinggi parti enggau PKR nengeri,” ku iya madah nengah mesej dianjung ngagai The Boreno Post bedau lama ke udah.

Iya disadang bediri ba sitak Bengoh.

Enti iya mujur dipilih nyadi chalun tu kali kedua iya bediri sepengudah PRN 2011 ngelaban Dr Jerip Susil ari Barisan Nasional (BN) ke menang 3, 646 majoriti undi.

Ku iya, iya seruran gawa bebendar ke rayat ba sitak Tarat enggau Bengoh, iya nya dua penuduk Kunsil Nengeri (DUN) ba baruh Parlimen Mambong.

Tandu Willie, parti dipelabaka bisi mua baru bediri ba Tarat iya nya entara lutur, luyar tauka injinir komputer.

Ba Pengawa Bepilih Besai (PRU) Ke-13 tu tadi Willie, ke mega nyadi Konsultan IT bediri ba Parlimen Mambong alah ngelaban Datuk Seri Dr James Dawos Mamit sepenyampau 9, 721 undi majoriti.

Iya teulihka 10, 740 undi enti dibanding enggau Dawos teulihka 20, 461 undi.