KUCHING: Seiku lelaki mabuk ke enda dikelala teparuk enggau dua bengkah kes bebadi jalai alun tang mujur ngebuka diri.
Kededua pekara tu nyadi di Kampung Tabuan Dayak kena malam Hari Enam tu tadi.
Ba penyadi ke terubah, lori dikena iya ngerudu pagar rumah. Iya enggau naka pengelengkas ngelarika diri.
Beberapa minit udah nya iya enggau naka pengelaju mai lori ngujungka tepawah lalu sekali tu ngelanggar tiang lekterik enggau tiang api jalai ke alai lori nya tepelungging.
Penyadi kedua tu semina beberapa meter aja ari penyadi ke terubah.
Penyadi kedua tu urung 11.50 malam semak jematan Kampung Tabuan Dayak ngujungka bekal karan bisi putus ba endur ke semak dia.
Iya tau dikumbai benasit enda telanggarka transformer lekterik semak jematan ke ngujungka utai nya meletup lalu tau nabanka nyawa.
Penyadi nya ngujungka orang mayuh ke diau dia begau tang iya jejampat ngelarika diri udah iya nerima jari ari bisi orang ke ngelala iya.
Sekeda saksi penyadi nya ngesahka deriba nya endang amat mabuk.
Enda lama udah nya Bomba enggau polis datai ngesahka lori nya direjister ari baruh sebuah kompeni lalu orang ke ngempu lori nya udah mega dipadah.