SARATOK: Enam iku nembiak Pom 5 Sekolah Menengah Kebangsaan (SMK) Julau ke maruk diri menyati seiku nembiak ari pom enggau sekula ke sama, ngaku salah udah bekau didawa di baruh Seksyen 324 Kanun Keseksaan di Kot Majistret, ditu, ensana.
Keenam-enam iku sida nya ngaku nyerang mansa kena 3 Julai tu tadi, jam di antara pukul 9 ngagai 10 malam di bilik No.7, Asrama Unisains, SMK Julau.
Dalam penyadi nya mansa nya dibukut, ditendang, dipalu ngena papan lapis jemari.
Ketegal nya mansa pedis sebelah tubuh nyengkaum ba dada enggau mata kanan iya.
Bepelasarka tasat ke udah dipejalaika polis, pekara tu nyadi bepun ba pengawa lumba enggau main ba padang SMK Julau maya pagi nya ke alai mansa bisi renjan jaku ngagai orang ke dituduh lalu mansutka jaku tundi mai seiku nya belaya di rumah buding.
Enda lantang ati enggau jaku ke dipansut iya nya dia deh orang ke dituduh nya lalu ngangau mansa ke diau di rumah buding di bilik lumur 4, mai iya ngagai bilik lumur 7 iya nya tempat ke alai pekara tu nyadi lalu dibai belaya.
Lebuh ke di bilik lumur 7 nya, mansa dipejamah enam iku sida ke dituduh nya.
Majistret udah netapka 10 September tu ila ngambika ngelempai ukum ba semua sida ke dituduh nya.
Sida enam tu dilepas nengah ikat jamin kot RM3,000 enggau dua iku penjamin lalu RM1,000 dideposit ngagai kot.