Piak ke bekaul diansak ngemanahka sistem bekal ai di antara Kuching-Serian

0

KUCHING: Opis Menteri Kerja Raya, Opis Menteri Pemansang Menua Pesisir enggau Kandang Menua sereta Opis Menteri Perengka Guna Mensia Mayuh diansak berengkah bejalaika atur ngangkat tikas bekal ai beresi ba kandang endur Kuching enggau Serian kelebih agi ba kandang endur bebukit ti kurang tekan ai.

Mandal Chairman Parti Keadilan Rakyat (PKR) Sarawak See Chee How madah, atur tu ulih nyeliah penusah suntuk bekal ai ngagai rumah, palan dagang enggau industri ba kandang endur nya ti majak mansang.

Ku iya, palan meresi ai di kampung Slabi ti udah dikemanah dua bulan ke udah ulih mantu Opis Kereja Raya (JKR) mutarka penanggul suntuk bekal ai ke alai paip baru ulih dipasang sereta ngembuan tekan ai tinggi.

“Bekal ai ngagai rumah ba tanah baruh udah diadu manah bedau lama tu tadi.

“Taja pia, rumah ke ba tanah bukit baka ke ba Taee Sijo sereta kandang endur bukai entara Kuching-Serian agi nagih bekal ai ti chukup,” ku iya ba siti aum pengarang berita di opis PKR Stampin ditu, kemari.

See ke mega Kaban kunsil Nengeri Batu Lintang madah, tekan ai baruh ti ditapi ruang bilik di tanah bebukit Bukar enggau Jalai Kuching – Serian nyadi ketegal bisi penanggul teknikal.

Taja pia, injinir JKR benung bejalaika pansik, ngiga pun penanggul.

Iya mega madah, Palan Meresi Ai Slabi ti ngembuan kapasiti 50 MLD (juta liter sehari), ulih mekal ai ngagai kandang endur Siburan-Serian sereta Serian nyentuk ke Tebedu enggau Simunjan.

“Palan tu ulih mekal ai ngagai semua rayat di menua nya dalam timpuh 10 taun ti deka datai.

“Berindik enggau nya, pengawa ti berat ti patut diperati JKR enggau ijinsi bukai ti bekaul iya nya bejalaika pansik ba perengka guna ti dikemisi nyengkaum palan endur nyimpan ai ungkup Serian-Siburan,” ku iya.