Wednesday, September 18

Program ngerejister pengada tekala nya deka diatur ba serata M’sia

0

KUCHING: Opis Pengerijister Bansa (JPN) ke dikuasa Opis Menteri Dalam Menua deka bejalaika Program Ngerejister Pengada Tekala nya nengah kerejasama sepital enggau kelinik di serata menua.

Sapit Menteri Dalam Menua Datuk Wan Junaidi Tuanku Jaafar (gambar) madah, program nya udah dipejalai di Sepital Kuala Lumpur lalu deka dikena di semua sepital enggau kelinik serata menua ba awak ke semak tu.

Iya madah, program nya ulih mutarka isu bekaul enggau pengawa ngerejister pengada anak kelebih agi ungkup sida ti jadi belaki bebini nitihka atur adat.

“Penanggul tu balat nyadi di Sabah. Berindik enggau nya, kitai numbuhka seiti program ngerejister pengada tekala nya nengah kerejasama sepital, kelinik enggau JPN,” ku iya.

Iya mansutka jaku nya lebuh dikerandau ba Majlis iftar Apresiasi Media nyerumba bulan ramadan ditu, malam ensanus.

Ngenang senentang pengawa tikah ti diatur nitihka adat, Wan Junaidi madah Sarawak ngembuan undang-undang ti meri kuasa ngagai bala tuai raban bansa, tuai rumah enggau kapitan di menua pesisir ngemendar tikah nitihka adat.

Ditanya bekaul isu garis menua entara Sarawak enggau Kalimantan Barat Indonesia ti kala dipetalat suba, Wan Junaidi madahka isu nya udah diputar manah.

“Kelikuh garis menua udah diputar ba taun 1976 ke alai sempekat begulai enggau Indonesia udah disetuju lalu penanda garis menua udah diletak lalu bisi mega diadu ngena penanda Global Positioning System (GPS).

“Semua penerang penanda garis menua bekenaka GPS bisi disimpan kededua Indonesia enggau Malaysia lalu sigi enda ulih diubah,”ku iya.

Iya madah isu nya dikemesai sekeda komiti di Indonesia sereta nyadi isu dikena bekimpin maya pengawa bepilih menua nya suba.

“Iya ke amat isu nya bula sereta enda kala nyadi lalu semina dikena bekimpin aja,” ku iya.

Bela datai Direktor FAMA Paza Dan, Kepala Polis Pelilih Kuching ACP Roslan Bek Ahmad sereta orang bukai.