Monday, October 21

Ugak nemuai ngagai Balai Bomba enggau Penyelamat Kapit

0

KAPIT: Kaban Parlimen Hulu Rajang Wilson Ugak Kumbong bisi nemuai sambil kereja ngagai Balai Bomba enggau Penyelamat Kapit.

Ugak, ke terubah sekumbang nya MP nemuai sambil kereja ngagai balai bomba nya, ku penerang ari pengari balai bomba nya.

Penatai Ugak disambut Kepala Opis Bomba enggau Penyelamat Kapit Pegawai Penguasa Bomba Erwandy Tangor enggau Kepala Operasyen Bomba Kapit, Sarjan Sengiang Usat.

Ba penemuai nya Ugak diberi penerang ngelansa bekaul enggau pengawa balai bomba Kapit. Antara sekeda isu ke bisi dibantai ba penemuai nya, minta Raban Bomba enggau Penyelamat Kapit disikap enggau perau laju ke lebih moden sereta perengka penyelamat ke chukup.

Tu beguna bendar laban menua Kapit semina disambung enggau jalai ai.

Pia mega, Ugak meri pengaga ati ngagai raban Bomba enggau Penyelamat Kapit laban udah mantu nyidi enggau nyelamat (SAR) ba penusah Kawan Mas ke karam ba Sungai Giam Bungan, Tanjung Kokok, Belaga kena 28 Mei tu tadi.

Nyerumba enggau nya, Ugak ngagihka geran perintah ngagai balai bomba nya dikena ngatur aktiviti sida. Geran nya diterima Erwandy ngarika Balai Bomba Kapit.