Monday, October 21

Bantaika surat kebuah kita enda tau ditingkil

0

SIBU: Kaban Parti Demokratik Progresif Sarawak (SPDP) ti ditemu ngelaban Barisan Nasional (BN) maya Pengawa Bepilih Besai ti Ke-13 (PRU13) tu tadi dipinta mantaika surat kebuah ngaga ulah baka nya.

Chairman SPDP Pampang Meluan Jerry Clement madah, iya deka mantaika pekara nya maya Aum Besai Ninting Taun (AGM) parti nya di Bintulu bulan Ogos tu ila.

“Kitai minta barang sapa ti ngelaban BN tu mantaika surat kebuah sida enda tau ditingkilka ari parti.

“Kitai enggai, sida tu nyau nyadi senampun dalam isi,” ku iya madahka pekara nya sebengkah ari resolusi ti udah dikemendarka ba AGM SPDP Pampang Meluan ngagai pengarang berita, kemari.

Ngenang AGM SPDP pampang Meluan ku iya, sebengkah ari resolusi sida maya nya baka ngarapka projek pemansang baka ngaga jalai alun, kuasa letrik, bekal ai, pengerai enggau projek rumah rayat dipejalaika.

“Sekeda ari projek tu baka ngaga Jalai Entabai/Ulu Kanowit enggau Jalai Entabai/Engkamop, Jalai Nanga Entaih/ Ulu Kemalih, simpang Batu 16/Nanga Sengaih.

“Pia mega baka melakin Jalai Pakan/Entabai, projek letrik enggau bekal ai ba Kunsil Nengeri Meluan,” ku iya ngerintai resolusi sida.

Jerry mega madahka, kelimpah ari nya sida ngarapka pengawa nyiri nyadi penghulu baru ba pelilih Julau enggau Ulu Entabai ulih dilengkaska.

“Kelimpah ari nya, setipikit tuai rumah mega patut dipansutka enggau lengkas ngambika sida nadai bepenanggul bejalaika tanggungpengawa,” pia ku iya madahka baru.

Nambahka nya mega, ba aum nya, resolusi maduka pengawa nyadi temenggung dipilih ari parti BN ti bisi penau ba DUN Meluan enggau Pakan mega dikemendarka.

“Ba tu mega, resolusi maduka dua iku agi kaunsilor ba DUM Meluan bela dikemendarka,” ku iya madah.

Resolusi ke bukai ti dikemendarka baka minta dua iku Kaban Parlimen SPDP ulih dikerunding megai pengawa ba renggat menteri besai.