Berindik ari nya, sebana ke ditapi peranak menua muntang dikenatai sereta ditemu pengari rayat
SRI AMAN: Ketuai raban bansa tauka ketuai genturung pendiau, tuai rumah enggau chairman Komiti Pemansang enggau Pengelikun Genturung Pendiau (JKKK) patut manggaika penyadi penanggul ba endur sida ngagai Opis Pelilih Mit Menua ngambika pekara nya dikenataika sereta ditemu pengari rayat.
Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis (gambar) madah, orang ti mangku tanggungpengawwa nyadi ketuai raban bansa patut betemu enggau nembiak redak betanyaka penanggul ke ditapi sida.
Harden ke mega Kaban Kunsil Nengeri (ADUN) Simanggang bejaku munyi tu pengudah ngulu aum begulai enggau 35 iku Tuai Rumah sereta Ketuai raban bansa ba kandang menua Ulu Undop ba Opi Parti Sa’ati Rakyat Sarawak (SUPP) pampang Simanggang ditu, kilah ensanus.
Segenap genturung pendiau endang bisi betapi enggau penanggul, nya alai ketuai raban bansa patut betemu enggau nembiak redak ningaka penanggul nya ngambi ulih dikenataika ngagai Opis Pelilih Mit Menua tauka pengari rayat.
“Anang sekekali mutarka pekara nya melakangka orang ti landik sereta nemu senentang penanggul nya,” ku iya.
Harden mega ngelalau, ketuai raban bansa patut ngembuan ulah ke manah ngambika tau nyadi chunto ngagai semua nembiak redak sida.
Berebak enggau aum nya, Francis mega nyuaka 35 unit Laptop 1Malaysia ngagai bala Tuai Rumah enggau Ketuai raban bansa ke ngulu aum nya.
Sama bisi maya nya, Pemancha Samuel Lawen enggau Pengulu Micheal John Sanggop.