Tuesday, November 12

Lo: MPP deka bejalaika atur ke terit enda lama agi

0

KUCHING: Opis Kunsil Kandang Bandar Padawan (MPP) deka bejalaika atur ke terit dikena ngemunas bansal pedaja ke enda belisin dalam kandang kuasa opis nya.

Chairman MPP Lo Khere Chiang madahka mayuh notis ngasuh mindah udah dianjung ngagai raban nya ngelamatu, tang sida iya mengkang bingking enggai mindah.

“Nadai jalai bukai, MPP deka neritka adat ngambika semua bansal pedaja ke enda belisin dipunas.

“Mayuh nutis udah dianjung ngasuh sida iya mindah tang nadai kala dikemana,” ku Lo ba sebengkah aum pengarang berita pengudah tembu aum kunsil MPP di opis iya ditu, ensanus.

Ku iya, MPP napi penanggul besai senentang pekara tu ke alai bansal orang bedaja enda belisin ngachir ba mayuh palan nyengkaum Batu 3, Batu 7, Batu 10, Tapah, Matang enggau Siburan.

“Dagang sida tu ti numbuhka bansal ba sebarang alai ngujungka jalai majak sekut, pasar majak kamah sereta bebau lalu ngeruga pengelantang orang bukai.

“MPP deka ngerumpang bansal dagang sida sereta ngerampas barang,” ku Lo seraya madahka operasyen nya deka berengkah dipejalai di Siburan enggau Kota Sentosa dalam awak ke semak tu.

Dikena ngemujur operasyen nya, Lo ngansak raban orang politik ari kededua parti (perintah enggau penyakal) meri kerejasama ngagai MPP lalu enda ngemesaika isu nya ungkup pemaik semua rayat.

Ba kaul sama, Lo madah MPP benung begigaka palan endur ngempuru urung 500 iku orang bedaja di MJC.

Ku iya, raban nya enggai nyadi enda dipindah ngagai sebengkah palan ti disikap ngena perengka guna ti chukup ketegal pengawa sida ti bedagang ti palan endur engkah entukar di MJC balat ngujungka kandang endur nya kamah.

Atur nya mega nyengkaum 200 iku orang dagang ti bedaja ti Siburan.

Ba kaul bukai, Lo mega madah, pintu aluminium ‘roller Shutter’ ba kaki lima ti digaga enggau nadai pemendar ari MPP deka mega dirumpang.

“Kitai beratika dia sekeda orang dagang ngaga pintu aluminium ba depan kedai sida iya lalu tu udah ngempang pejalai mensia mayuh,” ku iya.

Aum Kunsil MPP nya mega ngerandau atur pengawa ngintu penyadi MPP diangkat nyapai status Kandang Kunsil.

Lo netapka pengerami nya deka diatur sehari tu 31 Julai 2013 dikena ngelai 17 taun penumbuh MPP nyapai Status Kandang Kunsil.

Bela datai Sapit Chairman Hashim Yap enggau Sekretari MPP Micheal Sawing.