Ari penyampau nya, 55.3 persin renggat ijazah lalu laluh tembu pelajar tikas diploma, ku Riot
KUCHING: Bepelasarka rikut nangka bulan Mei 2013, bisi 10,057 iku graduate nengeri tu ngerejister enggau Jabatan Tenaga Kerja (JTK), begiga ke pengawa puang.
Menteri Penguasa, Pemayuh Tubuh enggau Pengereja Pengawa Datuk Richard Riot Jaem madah, pemayuh ke ngerejister enggau JTK nya nembiak ke udah tembu ba renggat ijazah enggau diploma.
Iya mega madah peranak nengeri tu ke tembu ba pelajar Sijil Tinggi Pelajaran Malaysia (STPM), Sijil Pelajaran Malaysia (SPM), Penilaian Menengah Rendah (PMR) enggau ke nadai besekula mega bisi ngerejister diri ba JTK.
“Nangka bulan Mei 2013, kitai ngerikutka 10,057 iku graduate nengeri tu ngerejister diri ba JTK, ari penyampau nya 55.3 persin (%) tauka 5,557 iku ti tembu ba pelajar renggat ijazah lalu penyampau ke lebih nya tembu pelajar renggat diploma.
“Pemayuh ukai-graduate nengeri tu ti ngerejister diri enggau JTK iya nya bisi 19,671 iku, lalu ari penyampau nya 17.2% nembiak ti tembu pelajar renggat STPM; 10.5% (setipikit pengelandik); 64.1% (SPM); enam persin (PMR); 1.9% (baruh ari PMR) enggau 0.2% nadai pelajar sekula.
“Tu semina sebagi statistik pengereja pengawa ti nunjukka kitai, kelebih agi bansa Bidayuh, raban graduate bisi awak masuk ke dalam makit kereja,” ku iya.
Riot ti nyadi Kaban Parlimen Serian mansutka pekara nya lebuh bejadika Aum Tiga Taun Sekali Ke-3 Sarawak Bidayuh Graduates Association (SBGA) ti diatur ba Indu Opis DBNA ditu, lemai kemari.
Taja pia ku iya, pemayuh peranak Sarawak ti nadai kereja agi baruh iya nya 3.5% (2012) ari penyampau pengereja pengawa ti urung 1.2 miliun serata menua.
Pemayuh nya (3.5%) nunjukka penyungkak iya nya orang ke nadai kereja majak kusut dibandingka enggau 4.6% taun dulu ari nya, ku iya.
“Mayuh peluang ti disediaka nengah macham industri ti nyengkaum industri betanam betupi enggau bekebun bedandang besai; kilang; konstraksyen; servis; minyak enggau gis; elektrikal, wang enggau insuran, dagang, pengangkut enggau mayuh industri kebukai,” ku iya.
Kelimpah ari nya, lebuh dikerandau iya madahka di menua Malaysia bisi 12.8 juta iku pengereja pengawa lalu ari penyampau nya bisi 1.2 iku orang gawa ba opis perintah lalu laluh nya ukai gawa ba opis perintah.
Ari penyampau 11.6 juta ti ukai gawa ba opis perintah nya, bisi 1.5 juta iku pekereja ari menua tasik ti bisi peremit, ku iya.
“Ari pansik enggau perati kami, tiap pekereja ari menua luar ti direjister nya kami belaba sama enggau urung seiku pengereja pengawa ti nadai peremit,” ku iya.
Lebuh ditanya bekaul enggau mai pulai peranak Sarawak ti gawa di menua tasik ke menua tu, iya madahka pengawa nya dikereja opis menteri iya berengkah taun baru.
Iya madahka Talent Corp enggau SME Corp dibaruh Opis Menteri Penguasa, Pemayuh Tubuh enggau Pengereja Pengawa diberi tanggungpengawa mai peranak menua tu ti gawa di menua tasik pulai ke Malaysia.
“Kami ngarap bendar inisiatif tu dipejalaika enggau chakah taun baru.
“Timbal ari sida ke gawa di menua tasik pasal pekara tu amat manah. Aku arap bendar mayuh orang ti gawa di menua tasik deka pulai gawa kitu lalu pekara bekaul enggau orang pandai gawa di menua tasik nadai nyadi agi udah tu ila,” ku iya ti nadai madahka pemayuh peranak Malaysia ke gawa di menua tasik.
Sama bisi dalam pengerami bejadika aum tiga taun sekali SBGA kemari, Presiden gerempung nya, Dr. Frank Kiong enggau kebukai.