Tuesday, November 19

Dua iku parai, tiga balat bakal dalam kes aksidin di Betong

0

BETONG: Sebengkah penusah bebadi jalai alun udah nyadi di KM56 Jalai Sri Aman/Sarikei tumu pagi kemari ngujungka dua iku parai, seraya tiga iku balat bakal.

Dalam penyadi urung pukul 6.35 pagi, Proton Saga ke ditepan empat iku mansa ari Sarikei tepawah lalu nya ngasuh deriba Viva enda ulih nyeliah lalu ngerudu kerita mansa muak ke kiba.

Udah ke belantak nya, kerita ke ditepan mansa balat keremping muak ke kiba ngujungka dua iku mansa ke duduk muak ke kiba nya parai seraya deriba luput sereta penumpang di belakang bakal.

Dua iku mansa ke parai nya Ling Lee Chen, 26, enggau Anthony Wong Siow Wei, 28. Sida ke bakal nya deriba Ling Tai Hung, 24, enggau Stephanie Ting Xiang Chii, 20. Semua sida tu asal ari Sibu. Seraya Nora merekah tulang kaki kiba.

Semua sida ke bakal nya ditabanka ngagai Sepital Betong ngambika diperubat tang laban pemedis sida tu balat nya alai sida lalu dianjung berumban ngagai Sepital Besai Sarawak (HUS) ngambika diperubat silik agi.

Mansa ke parai nya lalu dibai ngagai Sepital Sri Aman ngambika di buntas tasat.

Seraya nya, Pemesai Bomba Kanan II, Hamden Bladi ari Balai Bomba enggau Penyelamat Betong ke ngulu raban nyelamat madahka sida nerima kangau pinta sah pukul 6.40 pagi.

Sepengudah ke nerima kanggau nya sida pan berumban angkat lalu datai ba tempat penyadi 10 minit udah nya.