Tuesday, November 12

Raban nembiak Bidayuh diansak bela megai tanggungpengawa ngemansangka bansa diri

0

KUCHING: Raban nembiak bansa Bidayuh diansak bela megai tanggungpengawa ngemansang bansa diri.

Menteri Muda Pengerai Mensia Mayuh Dr Jerip Susil madah taja pan nembiak Bidayuh belumba ngulihka pemandai sereta pengelantang idup di nengeri, tang pemansang komuniti Bidayuh mega patut dikemerat.

Ku iya, ngenanka adat enggau main asal Bidayuh deka nentuka bansa nya mengkang bediri sama tegap enggau bansa bukai sereta dikelala semua lalu aset baka tanah NCR ke dikemisi patut dikemansang.

“Berindik enggau nya, raban nembiak patut ngaul diri dalam program pemansang sereta pengawa main asal Bidayuh.

“Tanah NCR dikemansang, muka dandang sawit tauka getah ti tau endar myungkak penatai belanja,” ku iya maya bejadi Forum Nembiak ti diatur Gerempung Graduate Bidayuh (BGA) di Bangunan DBNA Jalai Ong Tiang Swee ditu, kemari.

Iya ke mega Kaban Kunsil Nengeri (ADUN) Bengoh, netapka raban nembiak patut ngadu kerejasama begulai enggau raban ke tuai nentuka tanah NCR sida iya disukat lalu dikeluar surat pala tanah.

Jerip ngansak nembiak nyaup nentuka pemujur program ‘Land Documentation’ ti dipejalai Biro Tanah DBNA ngambika pengawa nyukat kelingi tanah NCR mudah agi dikereja.

“Tanah NCR tu meh sebengkah reta ti berega ungkup kitai. Tentuka program ‘Land Documentation’ tu mujur ngambika tanah kitai tau diberi surat pala tanah lalu dikemansang,” ku iya.

Ba kaul bukai, Jerip netapka semua genturung pendiau bansa Bidayuh deka disikap engau perengka guna ti chukup.

Ku iya, enda lama agi jalai alun, bekal elekterik, bekal ai beresi sereta ke bukai deka disedia ba tetiap genturung pendiau.

“Nangkanka nya ila, pengudah semua infrastruktur disedia, atur ekonomi ti tau mulaika penguntung ngagai rayat deka dikerembai ba tiap genturung pendiau.

“Berindik enggau nya, komuniti Bidayuh kelebih agi raban nembiak patut nyikap diri ngambika ulih nangkup program pemansang ekonomi tu,” ku iya.

Bela datai Presiden BGA Dr Frank Kiong, Presiden DBNA Datu Ik Pahon Joyik, Temenggung Austin Dimin sereta orang bukai.