Seraya nganti projek meresi ai dikemendarka perintah, tangki nya mantu penyikap sekeda penusah nembiak
SRI AMAN: Penanggul ai ke suah nuntung tiga buah sekula Sekondari di pelilih Sri Aman ngelama tu deka dikemeratka pengari rayat ditu.
Menteri Muda Pemansang Menua Pesisir enggau Pengawa Berumah, Datuk Francis Hollis udah nyuaka 50 igi tangki kena nyimpan ai 2,000 liter ngagai ketetiga buah sekula nya.
Ari penyampau nya, 30 igi tangki diberi ngagai Sekula Sekondari (SMK) Simanggang lalu SMK Sri Aman enggau SMK Saint Luke sama bela nerima 10 igi tangki nya.
Ku Harden, iya mutarka penanggul nya ngena belanja ungkup Projek Mit Pemansang Menua Pesisir Kecil (MRP) dikena meli semua tangki ai nya ari kompeni Welda ke berega RM500 seigi.
“Aku arapka nengah stuk ai ke digalau sida ngena tangki nya ulih mantu mutarka penanggul suntuk ai ke ditapi tiga buah sekula sekondari nya ila,” ku iya.
Iya ke mega Kaban Kunsil Nengeri (ADUN) Simanggang madah ngagai pengarang berita munyi tu berebak enggau pengerami nyuaka tangki ai nya ke diatur ba SMK Simanggang ensanus.
Kelimpah ari nya, Harden mega bisi ati deka nambah 10 buah igi agi tangki ai ungkup SMK Sri Aman laban 10 igi tangki ai ke diatu nya enda chukup dikena nembiak ke bemalam ba sekula nya.
Ku iya, penanggul ai paip nya ulih diputarka enti perambu ngaga Stesyen Ngemata Peneras Ai di Sri Jaya enggau puak Pasar Sri Aman dikemendarka perintah ila.