Undang-undang ke terit deka dikena nganti EO, ku Nancy

0

BISI PENYIRU: Nancy (kiba) begambar enggau seiku anak mit, 6 taun Adli Nasrul ari Miri ke sama dikemataka Jamilah (kanan), maya nganjung pemeri Hari Raya ngagai Wad Pediatrik HUS ditu kemari.

KUCHING: Perintah enda deka ngena Ordinan Menua Siga (EO) taja pan mayuh penyalah ari pengawa betimbak ke nyadi di menua tu tang deka neritka undang-undang ari ke udah ke udah.

Menteri ba Opis Menteri Besai (JPM) Nancy Shukri madah, Perintah semina deka negapka undang-undang nagang pengawa salah, dijangka deka dibantai maya aum Dewan Rakyat di Parlimen dalam bulan September tu ila.

“Ke diatu kami benung beratika ni bagi ungkup dalam undang-undang ke ulih dikena.

“Polis udah bisi langkar lalu nganti kami mansik dulu pekara nya, lalu bejuraika pekara nya enggau Opis Attorney General (AG), tang ke diatu seraya nganti nya dikemendarka, kami meransang polis ngena genteran ukum tauka undang-undang baka ke bisi diatu,” ku Nancy.

Iya madah baka tu lebuh dikerandau sepengudah pengawa magi pemeri enggau duit Raya ngagai urung 28 nembiak mit di Wad Pediatrik di Sepital Besai Sarawak (HUS) ke sama diuluka kaban Gerempng Indu Dagang Wawasan Sarawak (SARANITA) betuaika presiden gerempung nya, Jamilah Shukri.

Iya madah, ke diatu sebuah lab deka dipunka pengudah hari besai Aidilfitri tu ila ke deka betuaika Menteri di JPM, ti mega nyadi Ketuai Pegawai Eksekutif ‘Performance Management and Delivery Unit (PEMANDU) enggau Senator di Dewan Rakyat, Datuk Seri Idris Jala enggau sekeda menteri bukai (Nancy empu, Menteri Dalam Menua Datuk Ahmad Zahid enggau Menteri di JPM, Senator Datuk Paul Low.

“Kami benung mutarka pekara tu, keterubah iya, Genteran tusun Ukum Nagang Pengawa Salah (Crime Prevention Act tauka CPA), ngena pemisi ke diatu, nyengkaum mansik undang-undang baru ke ulih mantu polis,” ku iya.

Nancy bechuntoka CPA alai polis ulih ngena genteran tusun ukum tu ngetan sebarang orang ke ditangkap sereta diriman 14 hari, lalu enti agi bisi pemerat ngetan sida tu lebih ari 14 hari, polis bisi hak datai ke 28 hari ngena undang-undang ke biai diatu.

“Baka ke dipadah Menteri Besai (PM), rayat mesti nemu, iya nya kitai begunaka undang-undang ke terit, tang nya baka ke patut digaga perintah laban pemerat perintah, pengelikun rayat..Nya alai bisi pemerat ngena undang-undang ke terit,” ku iya.

Naka kediatu ku iya, Malaysia agi beratika gaya undang-undang ke dikena di menua bukai (ke nadai undang-undang EO enggau ISA) tang menua nya nyangka bisi undang-undang ke terit, ke tau dikena Malaysia.

“Kami benung meda gaya undang-undang ke ulih nganti EO, baka undang-undang ke dikena Singapore, US enggau sekeda menua bukai ambika banding,” ku iya.

Nancy ngarapka udah abis pengerami Hari Raya Aidilfitri tu ila, sida iya deka berengkah ngaga pansik undang-undang baru nya sebedau iya diserah ngagai opis AG sereta dipejuraika  maya aum di Dewan Rakyat tu ila.

Nancy ti mega nyadi Kaban Parlimen Sadong Jaya madah, udah masuk tiga bulan (ari bulan Mei tu tadi) iya dipadu megai tanggungpengawa Menteri di JPM, bungkur kereja iya mayuh bekaul enggau undang-undang ke mayuh udah mai pejalai iya ngagai sekeda sitak pelilih menua di Sabah (lebuh Kot Tawan minta kot baru), kot di menua tu, sekeda opis Insolvensi enggau opis LPKP.

“Pengawa aku mayuh bekaul enggau undang-undang. Nyadi menteri ke beratika pekara nya, aku empu ‘turun padang’ meda kediri sebarang penanggul ke ditapi rayat enggau ijinsi Perintah.

“Semina ninga penanggul ari orang bukai enda chukup tang meda kediri, ngambika aku pan nemu bejuraika penanggul nya lebuh baum di Dewan Rakyat. Tambah, nyadi menteri pan, kami bisi KPI/NKRA ke mesti dijapai kami,” ku iya.