SIBU: Rumah Tebuka Hari Raya Aidil Fitri ba Genturung Pendiau Datu kena Hari Raya keterubah siti peneleba ke baru ungkup dua iku temuai ari menua Belgium.
Seduai nya, Katelyn Van Kerckhoven enggau Catherine Homble mar deka mantaika pengaga ati lebih agi bekaul enggau pemakai menua tu ke nyenyamai magang.
“Kami rinduka pemakai ditu laban ke nyamai amat,” ku Catherine, 47, lebuh berandau enggau pengarang berita maya ngabang Hari Raya nya.
Ku Katelyn, 46, seduai benung dalam pejalai ngelama 21 hari di Borneo lalu Sibu siti ari palan seduai iya singgah.
“Malin temuai udah mai kami kitu ngambika meda ngena mata diri pengerami ke diatur ba atas jalan tauka temawai ke udah bekau rumah angus,” ku iya.
Ku iya baru, sida mega ulih ngasaika penyelai gaya pengidup enggau adat asal peranak rumah panjai.
“Tu meh keterubah kami nemuai ngagai Borneo. Sebedau tu kami semina ninga aja senentang Borneo,” ku iya ke beasal ari Antwerp, Belgium.
Katelyn mega gagit endar ati meda penyelai atur nyambut pengabang maya Hari Raya laban enda kala meda pengerami ke baka nya sebedau tu.
“Aku berasai temegah ati meda pengelikun enggau pemereti ati ke bisi ditu ke nadai dipeda ba menua Eropah. Kaul enggau diri sebilik nya beguna amat,” ku iya seraya madahka diri agi deka nemuai ke Sibu dudi ila.
Lebuh ke ditanya senentang utai ke matak pengerindu iya ba pasar tu, iya madahka diri rindu meda Pusat Warisan Sibu, Pasar Sentral Sibu enggau Toa Pek Kong.
Sebedau sangkai di Sibu, seduai udah nemuai ke Kuching sereta deka nampung pejalai ke Mukah.