Monday, August 19

Penyikap K1M mandangka perintah ngemeratka pemanah pengerai rayat

0

KUALA LUMPUR: Dikena napi peminta penyikap perengka pengerai ungkup rayat, perintah merambu ngaga entara 40 nyentuk ke 50 buah Kelinik 1Malaysia (K1M) di serata Malaysia lebih agi kandang menua pesisir.

Menteri Pengerai Datuk Seri Dr S. Subramaniam madah, pengawa nyendiaka K1M deka dikemeratka ba kandang menua ke mayuh diuan rayat ke mit penatai pemisi.

“Taja pan bisi didinga sebana ari orang ke ngempuka kelinik bayar lebuh K1M ditumbuh, K1M tetap digaga sereta ngemeratka pengerai rayat seraya berubat nengah servis caj jauh murah.

“Nya sebengkah ari produk 1Malaysia ke udah mujur sereta ulih diasaika semua rayat sereta dikena nentuka tikas pengerai ke manah,” ku iya madah ngagai pengarang berita penembu ngulu ‘Malam Mesra Rakyat’ Begulai enggau Menteri Pengerai apin lama ke udah.

Diatu bisi lebih 200 buah K1M di serata Malaysia ke meri servis ngagai urung 1.5 miliun rayat ke semina dibayar RM1 ungkup peranak menua lalu RM15 ngagai peranak menua bukai.

Kelinik nya mega sebagi ari Juluk 1Malaysia, ke ditengkebang Menteri Besai Datuk Seri Najib Tun Razak ti ngemeratka pemanah kaul, penyerakup nasional enggau pemujur perintah bejalaika pengawa. — Bernama