Sunday, September 22

Jabu: SALCRA merambu ngaga palan penyungkak pengelandik di Bajo Lundu

0

KUCHING: SALCRA deka ngemansang sebidang tanah pemesai 40 ika di kampung Bajo Lundu nyadi palan pematih dikena nyungkak pengelandik pengereja pengawa.

Chairman kunsil nya Datuk Patinggi Tan Sri Alfred Jabu madah, palan nya ila ukai semina ungkup pengereja pengawa dalam SALCRA tang mega tau dikena ijinsi bukai ngatur licha sereta aum.

Ku iya, komiti ketuai SALCRA udah setuju ngemansangka tanah nya lalu enti tembu ila, palan nya deka dikena matih penyereta sekim ngambika tau nambah pengelandik enggau penau dalam industri bekebun sawit.

“Taja pia, palan tu ila ukai semina ungkup SALCRA enggau penyereta sekim aja, ijinsi bukai tau mega bekenaka palan di Kampung Bajo tu, ke alai palan nya deka disikap ngena perengka ti chukup,” ku iya.

Jabu mansutka jaku tu lebuh dikerandau pemberita pengudah bejadika Aum Komiti Pemansang Kebun Sawit SALCRA ke-5 di Palan Aum Besai Borneo Kuching (BCCK) ditu, kemari.

Iya ke mega Sapit Kepala Menteri enggau Menteri Betanam Betupi Moden sereta Menteri Pemansang Menua Pesisir madah, ungkus palan nya deka bepanggai ba rega tinda lalu disadang tembu gaga dalam timpuh 24 bulan.

Nyaut tanya senentang pinta Gerempung Orang Bekebun Sawit Sarawak ngambika perintah merati baru cukai nyual sawit Jabu madah, perintah nadai penanggul mending sereta ngerandau pekara nya begulai enggau raban industri.

“Perintah pedulika sebana sida, pekara ke patut diperati deka dialus ke alai perintah nemu ungkus ngereja kebun sawit nyau majak niki berindik ari gaji ti majak nambah.

“Aku meransang raban dalam industri tauka pengari mai pekara tu ngagai perintah nengah chara ke betul ngambika tau diperunding enggau manah,” ku iya.