Wednesday, October 16

Luta, Jilum sinu sereta gaga nerima bantu ari ADUN Krian

0

SARATOK: “Terima kasih ngagai Kaban Kunsil Nengeri (ADUN) Krian, Ali Biju ke udah berundingka penanggul ke ditapi kami,” ku Luta Sigat enggau Jilum Apar.

Seduai bejaku munyi tu lebuh ADUN Krian nya, nyadi orang keterubah mantu sida ke tasah laban kudi kena ujung bulan siti nyin tadi, 27 Julai.

Ketegal penusah nya, atap rumah panjai seduai di Rumah Tambi, Sungai Isu, Krian mayuh rusak dikebuka angin.

Ku Luta, berindik ari penusah nya, seduai bisi minta bantu ari sekeda raban ke bekaul dikena ngelempungka tating pengidup ke ditanggung seduai.

“Taja pia, nyentuk ke sehari tu, peminta kami duai lalu nadai ditimbal raban nya.

“Taja pia, mujur ga sehari tu ADUN Krian nemu penanggul kami duai sereta nyuaka bantu dikena ngelempungka tating pengidup kami duai kenyau ari ke di tinggang penusah nya.

“Kami berasai sinu endar ati nerima bantu tu laban kami ngasaika ADUN Krian tu udah mandangka iya seiku pengari ke siru ke rayat sereta nemu tanggungpengawa diri,” ku Luta.

Luta Sigat enggau Jilum Apar udah nerima bantu ari ADUN Krian nya ba opis Parti Keadilan Rakyat (PKR) ditu.

Bantu nya disuaka pengari ADUN Krian, William Barang ke mega Ketuai PKR pampang Saratok,.

Sama bisi maya nya, Sekretari PKR pampang Saratok, Bungan Ekie enggau Tukang Wang PKR pampang Saratok, Elly Chandi.