Tuesday, September 24

Abg Jo enggai meri penemu sekalika iya deka nganti penuduk presiden parti PBB tauka enda

0

KUCHING: Beserimbai enggau konvensyen Parti Pesaka Bumiputera Bersatu (PBB) kena 18-20 Oktober tu ila, taja pan munyi ke dipadah nadai penuduk tinggi deka diperebut, tang jaku politik mensia mayuh madah, nyangka Sapit Presiden PBB, Datuk Amar Abang Johari Tun Openg (gambar)dipelaba deka nganti penuduk presiden parti nya.

Presiden PBB ke diatu agi dipegai Kepala Menteri Pehin Sri Abdul Taib Mahmud.

Abang Johari ti mega Menteri Pengawa Berumah enggau Menteri Dagang Temuai, lebuh dikerandau pengudah bejadika dua buah bas City Public Link (CPL) di Palan Borneo Konvensyen Kuching (BCCK), ti deka dikena ngaga promosyen WAG (World Animal Groove) Festival ti deka diatur di Kuching kena 12 Oktober tu ila, enggai nimbal penemu  nya.

“Aku enggai meri sebarang timbal, awakka orang bukai nimbal. Tanya nya enda berat tang pemerat kami (Perintah BN) deka ngemansangka menua tu….Enda ku nimbal tanya nya,” ku iya.

Ba jaku politik, nyangka Abang Johari bisi peluang nganti Taib nyadi Kepala Menteri nyengkaum mangku pengawa nyadi presiden parti.