Thursday, September 19

Penemuai STSB Nanga Jagau ke Ulu Engkari meri peneleba

0

PIRING PEDARA: Miring dulu ba pendai Tembawai Sungai Batu Bedau sebedau niki bukit alai buluh penyilih munsuh Aki Muntai tumbuh.

SIBU: Komiti Sistem Tagang Ai Bugau (STSB) ari Nanga Jagau Sungai Ngemah, Kanowit bisi ngatur pengawa nemuai sambil belajar ngagai Rumah Liam, Rantau Kemayau Manis, di Ulu Engkari, Lubok Antu kena 8 ngagai 10 Ogos tu tadi.

Raban ke disempulang 24 iku tu betuaika Chairman Pro-tem Serakup Ai Kajah (SERAK) ianya ex-kaunsilor Kujat  Dudang enggau Chairman STSB Ajan Kelo.

Sida sebuat meleka ari pasar Kanowit pukul 8.00 pagi lalu datai ba Tekat Ai Hidro Batang Ai pukul 11.00 pagi sebedau mudik ke Ulu Engkari ngena tujuh buah perau panjai.

Penatai sida ba Rantau Kemayau Manis urung pukul 5.00 lemai disambut peranak Rumah Panjai Liam dikelalu ngena piring sereta adat asal Iban.

Ngalihka malam penyanding penemu raban tu Dr Charlie Dudang madahka tuju penemuai sida seraban.

Ku iya, raban sida deka meda pemujur Sistem Tagang ke ditumbuhka Opis Betanam Betupi ba Rh. Jaong di Lubok Pantu.

Kelimpah ari nya, awak nya mega dikena sida nyidi kaban-belayan ti agi tinggal di Batang Engkari.

Ngalihka pagi, bala raban tu bisi niki ngagai sebengkah bukit ti nitihka jerita tuai bukit tu bisi penyelai.

Ba bukit tu bisi tumbuh sepun buluh mambu ti nyelai ke dikelala buluh penyilih munsuh bepun ari jerita insak Aki Muntai ke disimpan iya dalam betung ti ditinggal ba bukit nya dulu suba.

Insak iya kenu ku jerita tau ngasuh munsuh enda tepedaka rumah panjai sida ari ke dikayau.

Buluh nya enda ulih semampai dipeda belama tang nitihka nasit seiku-seiku.

Taja pia, raban tu mujur meda penyelai buluh tu sehari nya.