KUCHING: Opis Menteri Dagang Temuai nengah ‘World Animal Groove’ (WAG), sebagi ari pengerami renggat antarabansa ulih ngangkatka nama Sarawak di mata dunya ba dagang temuai, maya pengawa nya ba bulan Oktober 2014 tu ila.
Menteri Dagang Temuai Datuk Amar Abang Johari Tun Openg madah, pemujur WAG Festival taun nyin tadi mandangka WAG Festival diberi kelala nyadi sebagi ari pengerami renggat dunya baka ke bisi di menua tu, iya nya Rainforest World Music Festival (RWMF) di Kuching, Jazz Festival di Miri enggau Folk Dance Festival di Sibu.
“Pengerami tu tau bendar nyadi sebangi ari pengerami ke ulih ngangkatka Sarawak, laban kitai ulih ngempuru mensia mayuh di serata dunya datai kitu, laban enti mensia mayuh udah nemu ba menua kitai tu bisi pengawa baka tu, ukai semina ngelalau mensia mayuh bekaul enggau jelu tang pengawa begempuru tu alai betukar penemu, kelimpah ari Sarawak menua ke endang ngemeratka pemanah rampa menua enggau jelu.
“Kami nyukung atur pengawa ti digaga ‘Soceity for the Prevention of Cruelty to Animals’ (SSPCA) laban kitai pan ngajar komuniti kitai nyadi orang ke siru ke jelu.
“Enti kitai bisi penyiru ba jelu, kitai enda sengapa ngelakka jelu tupi kitai ditinggal sebarang alai,” ku iya.
Iya madah munyi tu maya aum media nyuaka tambai ngagai gerempung ke sama bisi nyukung pengerami WAG Festival, iya nya kompeni bas CPL enggau OurYouth.com di Palan Konvensyen Borneo Kuching (BCCK) ditu, kemari.
Iya madah, diatu perintah benung mantu SSPCA ngiga palan ke tau alai ngaga palan nyaga jelu ke disadang deka digaga enggau ungkus RM1.5 miliun, enda jauh ari Bau, lalu benung diputarka Opis Tanah enggau Survei (JTS).
Naka ke diatu, SSPCA agi begunaka belanja kena ngaga palan nya.
Tang taja pia, Abang Johari madah, Perintah Menua mega deka mantu SSPCA ngulihka belanja dikena mantu ngaga palan nya.
Kelimpah ari nya, iya madah, Opis Menteri nya agi benung ngiga tanah puang ke patut alai ngaga palan Jelu Diau (Animal Village) laban palan tu deka nyukung pengerami bukai baka ‘Music Festival’ ke endang udah bisi palan iya empu.
Iya nambah, dalam kandang lima taun tu ila, Kuching deka mansang nyadi nengeri ke besai, kelebih agi lebuh pemansang Isthmus deka digaga manah agi.
“Enti Isthmus udah digaga manah agi, setipak endar ngaga WAG Festival laban kitai pan bisi jeti ke deka nyambung BCCK nengah jematan ke disikap ngena ‘aircond’,” ku iya.
Sebedau nya, presiden SSPCA Dona Wee madah dalam pengerami WAG Festival tu ila, atur pengawa deka digaga nyengkaum simposium antarabansa, 12 Oktober ‘Animazing Run’ 10km ke deka digulu urung 1,500-2,000 iku mensia belanda.
“Dalam pengawa bansa tu kami, ngarapka ulih ngumpul belanja kena kami ngaga palan alai nyaga jelu (Animal Village) enggau belanja kena kami nyaga palan SSPCA kediatu di Batu 7. Taun nyin tadi kami mujur ngumpul RM150,000 lalu ngaraka taun tu mayuh agi ari nya,” ku Dona.
Malam nya mega, bisi pengawa pemerindang ke udah ngerintai pemuzik tebilang baka Gabriel Louis (Singapore), The Bottle Boys (Denmark), Aviit and Friend (India) nembiak sekula bemain perengka muzik Gamelan (SMK Matang) enggau Nading Rhapsody (Sarawak) enggau seiku orang ngaga ‘lawak jenaka’ BibiKaypo.
Malam 11 Oktober, pengawa makai lemai deka di atur di BCCK ke deka ngerintaika pemuzik tebilang baka Amir Yusuff.
Mensia mayuh ke deka nemu enggau silik agi atur program tu enggau bayar iya, tau ngelawa nengah ‘online’ www.ticketexpress.com.my tauka betanya ba opis UCSI Communications Sdn Bhd di Setia Commercial Centre, Jalai Setia Raja tauka betelefon nengah lumur 082-368109 tauka 011-12677388
Sama bisi ngulu atur pengawa nya kemari, presiden Gerempung Sarawak Lawn Tennis (SLTA) Dato Patrick Liew enggau chairman SSPCA, Rebecca D’Cruz.