KEPENGINGAT: Fatimah (dua kanan) enggau Tay (kanan) nunjukka baju ke dikena pesereta ‘Run for Peace 2013’, lalu diperati raban Soka Gakkai Malaysia ke bukai.
KUCHING: Orang dagang di nengeri tu dilalau enda ngena awak nikika rega barang berindik ari rega RON95 enggau diesel berengkah ditikika tengah malam ensanus.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, nya ke pengelantang orang ti kurang penatai pemisi di nengeri tu.
“Kitai ngarapka rega barang enda agi ditikika, ngirauka kitai kebendar iya enti gaji niki rega minyak niki laban sabsidi dikurangka ngujungka utai bukai niki, nya kebendar pangka besai rega barang niki.
“Kitai ngarapka ijinsi ti bekaul patut nukuka barang bukai enda ditikika rega. Orang dagang mega enda patut ngena awak tu (rega minyak niki) nyadi ketegal nikika rega barang bukai,” ku iya lebuh dipinta meri penerang bekaul enggau peniki rega minyak malam ensanus ba sebengkah aum pengarang berita.
Bejaku baru,seraya ngarapka rega barang enda agi niki, iya madahka rasional perintah nikika rega nya ngambika orang ti kurang bepenatai pemisi nya amat ulih ngasaika sabsiri ari perintah.
Kebuah pia ku iya laban sekeda orang ngena awak ke diberi perintah nya enggau tuju ti enda patut baka bejualka minyak nya ngagai orang luar.
Sabsidi perintah endang ke penguntung ngagai rayat ti kurang bepenatai pemisi tang orang ti untung orang bukai ke ngena awak bejualka minyak sabsidi nya ngagai orang bukai, ambika banding orang berikan nyual ngagai orang luar lalu teulih rega besai agi dibandingka enggau asil berikan, ku Fatimah ti bechuntoka orang berikan ti kala kena tangkap.
“Peniki rega minyak tu endang amat meri pangka ngagai orang ti kurang bepenatai pemisi, bisi ubah ngagai nama ke dikereja tiap hari nya alai kitai mega patut ngubah mimit chara pengidup kitai,” ku iya.
Menteri Besai Datuk Seri Najib Tun Razak ensanus madahka peniki rega minyak RON95 enggau diesel sepenyampau 20 sen berengkah tengah malam ensanus.
Nya sebengkah rasionalisasi sabsidi ulih perintah, ku iya dalam aum pengarang berita ensanus.
Kelimpah ari nya, Fatimah kemari mega bisi nerima penemuai basa ari raban Soka Gakkai Malaysia ti madahka pasal ‘Run for Peace 2013’.
Nitihku Setiausaha Kehormat Soka Gakkai Malaysia Tay Thing Swee madahka lumba ti ngemeratka pengerai nya deka diatur kena 8 September ba Amphitheatre Taman Budaya berengkah pukul 6 pagi.
“Pelanda ti ngemerat sereta ngelakuka pengidup bepengerai nya deka dipenyadika tauka dilepaska Fatimah enggau Datuk Bandar Kuching Utara,” ku Tay seraya madah pengawa ngerejister udah ditutup tang ngagai sida ke agi bisi ati deka masuk pelanda tu tau datai maya 8 September tu.