Wednesday, May 19

JKKK Kampung Bahagia Jaya Fasa 3 ngintu Hari Merdeka

0

SIBU: Komiti Pengelikun Genturung Pendiau (JKKK) Kampung Bahagia Jaya Fasa 3, Teku ditu bela enda tinggal ngintu Hari Merdeka kena malam 31 Ogos tu tadi.

Pengerami ke digulu lebih 70 iku bala dia diatur ba Dewan Randau JKKK Kampung Bahagia Jaya disempulang enggau mayuh macham bengkah program.

Sekeda ari program ke bisi diatur maya tu iya nya belagu lagu patriotik, makai beserumpu, pekit karaoke, lagu sepunsa enggau mayuh program ke bukai.

Chairman JKKK Kampung Bahagia Jaya Fasa 3 Narok Injing ba jaku pengelalu iya ngelalau peranak genturung pendiau nya ngemeranka ulah beserakup enggau pangan diri kelimpah bekerejasama maya bisi ngatur pengawa.

Bekenangka pengerami ke diatur sida, ku Narok, pengerami nya dikena ngerekaika ulah patriotik ba rebak baru kelimpah mandangka diri semampai temegah ati ngintu Hari Merdeka.

Ba pengerami nya, sida mujur teulihka RM1,000 lalu pulai ngagai wang turu JKKK sida.

Narok mega madah, wang turu nya deka dikena JKKK sida bejalaika program laban nadai nerima bantu baka geran projek mit menua pesisir (MRP) ari perintah kenyau empat taun sitak nya udah dipegai parti penyakal.