Penyampau RON95 enggau diesel ke niki 20 sen seliter enda patut dikemesai nyadi isu politik: Wong
KUCHING: Rega minyak RON95 enggau diesel ke niki 20 sen enda patut nyadi isu politik laban barang sapa ke megai perintah, patut beratika pengulih pemisi menua.
Menteri Wang Kedua, Dato Sri Wong Soon Koh madah, enda ngira sapa megai perintah, baik nya Barisan Nasional (BN) tauka penyakal pemisi sereta pengulih menua mesti dijaga, laban ke berat, iya nya penyampau ke ditiki nya agi ulih diterima rayat.
“Kitai nemu nukuh polisi ke dikerindu mensia mayuh enti kitai deka nyadi popular, tang kitai mega patut landik nyaga pengulih penatai pemisi menua ngambika semua rayat agi ulih nerima penyampau ke ditiki nya (sekali ke tu rega minyak RON95 ditiki 20 sen).
Wong madah, rega minyak nya nitihka maya ke patut ditikika taja pan semina niki 20 sen tang patut dikeingatka, rega petroleum ke niki di Malaysia, agi jauh baruh enti dibanding enggau menua bukai ba sepiak kitai.
“Laban bill sabsidi udah mayuh nambah, kebuah kitai patut ngubah ngambika ulih diterima sereta enda kelalu berat ba rayat.
“Rega RON95 enggau diesel nyangka tau nyadi penanggul ba mensia mayuh, tang enti diperatika dalam menua, kitai ngubah mimit taja pan ukai suah rega minyak ditiki, bisi maya ke patut, iya niki,” ku iya lebuh dikerandau ba sebengkah pengawa ngelalu pengabang ‘Ramah Tamah Aidilfitri’ Opis Kunsil Bandaraya Kuching Selatan (MBKS) di lobi opis kunsil nya ditu, kemari.
Kemari Menteri Besai (PM), Datuk Seri Najib Razak madahka rega diesel enggau RON95 niki 20sen seliter belabuh ari tengah malam kemari.
Berindik ari nya, rega RON95 deka ditetapka RM2.10 seliter lalu diesel RM2.00.
Tu keterubah rega minyak ditiki kenyau bulan Disember 2010.
Berita Bernama, Najib ke mega Menteri Wang, ke diatu perintah nanggung sabsidi urung 83 sen seliter ba rega RON95 sereta RM1 seliter ba diesel.
Taun tu perintah nanggung penyampau sabsidi RM24.8 biliun ba minyak enggau gis.
Taja perintah udah ngurangka bantu 20 sen, tang agi nanggung sabsidi urung 63 sen seliter ba RON95 sereta 80 sen seliter ba diesel.
Kena ngurangka pemerat tating pengidup rayat ke kurang penatai pemisi berindik ari rega minyak enggau gis ke niki, perintah deka nambahka bantu BR1M dalam bajet 2014, peyampau nya deka dipadah dudi ila.