SIBU: Peranak menua pesisir enda ulih nerima penyakal laban utai ke deka diguna sida agi jauh bebida ari peranak menua di kandang mengeri.
Kaban Kunsil Nengeri Kakus, Datuk John Sikie Tayai madah, parti penyakal baka DAP enda teulihka sukung ari pengundi di ulu entigis.
Ku iya, penyakal semina enggai enda nguji namaka diri ngagai menua pesisir.
“Ba runding aku, DAP nadai meri penanggul ngagai BN ba sitak menua pesisir laban tebal agi bala Dayak nemu parti nya ari Semenanjung. Pelaba aku sida enda ulih ngerembai sereta tama ngagai Kakus tauka sekeda sitak menua pesisir bukai ketegal pekara nya.
“Kita patut nemu, rayat di menua pesisir begunaka perintah ke diatu bejalaika program pemansang. Sida mengkang begunaka pemansang perengkaguna baka jalai alun, karan, ai enggau sekeda penyikap bukai kelimpah ari pemansang ekonomi.
“Semina perintah BN aja ulih nyendiaka semua tu,” pia ku Sikie, ke mega Menteri Muda Kunsil Kandang Menua madah ngagai The Borneo Post empai lama ke udah.
DAP Sarawak ngembuan juluk deka numbuhka 21 pampang ba menua pesisir ngambika sida ulih negapka diri tama ngagai menua pesisir.
Dalam bulan Julai taun tu tadi, Chairman DAP Chong Chieng Jen madah, pengerembai sida ngagai menua pesisir ulih ngemantupka juluk semua parti dalam komponen Pakatan Rakyat (PR).
Ku iya, sitak ke endang udah ditagit sida baka Tasik Biru, Kedup, Bengoh, Tarat, Balai Ringin, Simanggang, Engkilili, Bukit Saban, Pakan, Meluan, Ngemah, Katibas, Pelagus, Belaga, Kakus, Kemena, Marudi, Bekenu, Bukit Kota enggau Batu Danau.
Ku Chong, pengawa numbuhka pampang nya ulih ngemesaika agi peluang Pakatan menang ba sitak nya, enda ngira sekalika chalun ari DAP, PKR tauka PAS bepilih ba sitak nya.
Ku Sikie: “Maya Pengawa Bepilih Menua (PRN) dudi tu ila, BN tetap ulih ngalahka penyakal.”
Bekaul enggau undi ari orang ke biak, iya ngaku raban nya endang beguna amat.
Nya alai ku iya, raban nya patut dibalutka enggau mayuh bengkah atur pengawa ke deka diatur.
Ku iya, tiga bengkah pekara ke patut dikemeratka iya nya, pengawa puang, pelajar sekula enggau peluang ekonomi.
“Naka ke diatu dalam pelajar, sida deka nemu kati chara perintah ulih mantu sida ngulihka sekulasip. Pelajar sekula beguna amat ke sida laban pengidup sida dudi ila bepanggai ba nya.
“Ba peluang ekonomi, sida deka nemu bengkah peluang ke ulih dikereja sida,” ku iya.