Rega minyak niki nating pengidup raban ti kurang penatai pemisi

0

UNGKUS MAJAK NIKI: Bala mayuh ke mengkang ngena perau ngasaika ubah baru rega minyak nating pengidup sida ninting hari.

BINTANGOR: Atur nikika rega minyak RON 95 enggau diesel sepenyampau 20 sen nerima mayuh macham timbal ari mensia mayuh.

Ba pelilih mit tu, baikka ba sebelah kedai kopi enggau sebarang endur ba pasar Bintangor, mensia mayuh bela berandau enggau pangan diri senentang rega minyak ti udah ditikika berengkah ensanus.

Tebal agi bela ngeringka penemu diri pia mega bisi nya madahka nyangka atur baru perintah tu pulaikka pemaik ngagai rayat dalam timpuh panjai.

Pemancha Benjamin Legak maya dikerandau pengarang berita kemari madah, rayat kelebih agi ba pelilih nya berasai tekenyit bendar ninga ubah baru nya.

Ku iya, pekara nya kelalu lengkas diatur nejuka rayat enda ngadang kelimpah macham bengkah leman penemu bisi tebantai.

“Taja semina niki 20 sen aja tang kitai bela nemu rayat baka ba menua pesisir nyentuk ke diatu mengkang kurang penatai pemisi.

“Nya alai kitai berasai enda lantang ati enggau ubah tu taja kitai nemu ubah ke diatur perintah endang ngira pemaik rayat,” ku iya madah.

Ba penemu Tuai Rumah Peter Minggat ari Sungai Mupong, sida ke mengkang ngena perau deka ngasaika berat agi ditating ubah baru tu.

Kebuah pia ku iya, seagi-agi ngena perau, ungkus minyak endang jauh agi mayuh dikena enti dibida ngena kerita.

“Tu bida ngena kerita tauka perengka pengangkut ke bukai ba jalai alun enggau bala ke agi ngena perau tauka injin sepit.

“Nya alai, kami ke agi ngena perau tu berasai amat ngemansutka puku laban endang ninting hari bekenaka minyak ngiga belanja baka nyala tauka pengawa berikan bukai,” ku iya sambil madah sida serumah ambis nadai bekenaka empat ngagai lima gilin minyak tauka lebih nitihka pemesai injin enggau penyarat enti deka ngalu ngagai pasar Bintangor.

Ku Peter, ubah tu nyangka nadai diasaika sida ti bepenatai pemisi ti tinggi tang pekara tu nejuka rega bukai niki baka tambang ekspres kelimpah perengka pengangkut ke bukai.

Seiku pengereja pengawa kompeni luar ke semina deka dikelala enggau nama Uggah madahka, rega baru tu nating sida nyengkaum iya empu ke berundang gawa ari Bintangor ngagai Sibu ninting hari.

Ku iya, kelimpah rega minyak ke udah niki mayuh puku bukai dipansut ninting hari nyengkaum mayar tol.

“Enti ngena kerita bayar ba Tol Lanang RM6 pulai mansang ditambah enggau rega minyak udah niki 20 sen seliter, puku ke dipansut enda manding enggau gaji bulan.

“Bala ke besai gaji nyangka enda ngasaika ubah tu balat nating sida tang bebida ngagai sida ke bekuli begaji mit,” pia ku iya sambil madah ungkus dikena iya meli minyak ninting bulan ngena kerita sebedau tu, berundang ari Bintangor, antara RM400 ngagai RM500 lebih sebulan nyengkaum bisi maya ngena mutosikal.

Ungkus nya ku Uggah deka niki agi bulan tu enda nyengkaum puku makai enggau pekara ke bukai kelimpah bayar tol.

Tang taja pan baka nya, iya pechayaka ubah rega minyak ke diatur perintah tu bisi tuju bukai ti ngemeratka pengelikun enggau pengelantang pengidup rayat dudi hari ila.

“Taja kitai enda lantang ati tang kitai mesti ngembuan timpai runding ti jauh nyangka ubah tu pulai ke pemaik penatai pemisi menua,” ku iya madahka baru.

Ensana, Menteri Besai Datuk Seri Najib Tun Razak madahka ubah baru nya seiti ari chara rasionalisasi sabsidi perintah.

Sebedau tu, perintah ngemansutka sabsidi sepenyampau 83 sen seliter ungkup minyak RON95 enggau RM1 seliter ungkup diesel.

Dikena ngurangka tating pengidup rayat kurang penatai pemisi bekaul enggau rasionalisasi sabsidi minyak, perintah deka nambahka penyampau BR1M ba Bajet 2014 ti diperambu dibantai kena 25 Oktober tu.