RUNTUH: Rumah pengajar SK Lepong Gaat ke udah runtuh kena Hari Enam tu tadi.
PATUT DIKEMANAH: Jematan kayu nyambung SK Lepong Gaat mega patut dikemanahka agi.
Ramu dikena ngaga buding sekula ke tejanggal nya udah bisi, dipelabaka tembu ba ujung Okt taun tu
KUCHING: Ramu tauka kereban dikena ngaga buding SK Punan Ba ke bedau tembu udah datai lalu projek nya dipelabaka tembu ba bulan Oktober taun tu.
“Baka ke udah dipadahka kami, projek tu benung digaga lalu kami melabaka projek tu tembu ba bulan Oktober tauka 24 Oktober taun tu enti nadai penanggul besai nuntung,” ku kontrektor Irok Industries Sdn Bhd Alexander Asing Sadai madah ngagai The Borneo Post kemari.
Beranda buding indu udah runtuh ba bulan Januari 2012 ngemakalka 18 iku nembiak nyengkaum lima iku balat bakal. Beduduk ari nya, buding indu nya udah diasuh puang kelimpah buding lelaki kena nyeliahka penusah ke sebaka nyadi jemah ila.
Projek ngaga baru buding SK Punan Ba udah dikemendarka perintah ujung taun nyin tadi.
Urung RM2 miliun udah diagih dikena ngaga dua buah buding lalu diperambu tembu ba bulan March taun tu.
Taja pia, kontrektor projek semina ulih nembuka sebuah aja lalu sebuah da agi tejanggal ketegal enda chukup ramu tauka kereban bukai.
Berindik ari nya, Kaban Parlimen Hulu Rajang Wilson Ugak Kumbong enda lantang ati enggau kontrektor lalu minta Opis Menteri Pelajar (KPM) ngambi atur ke patut ngagai kontrektor nya.
“Kediatu, semua nembiak diasuh bemalam ba rumah kepala pengajar. Nembiak tinduk dedat begulai mayuh ba sukut ke udah disediaka. Aku chukup kasih meda sida.
“Pia mega, sekula nya nadai nerima bekal kuasa karan enggau ai. Iya ke bisi semina buding nya aja tang nembiak enda ga ulih tama kia,” ku Ugak.
Kelimpah ari SK Punan Ba, Ugak madah mayuh agi sekula bukai ba sitak pegai iya patut diperundingka opis pelajar tauka KPM.
“Kena Hari Enam tu tadi, rumah bala pengajar ba SK Lepong Gaat runtuh. Nasit bendar bala pengajar ke mangkang diau dia, nadai dia maya penusah nya nyadi.
“Bala pengajar dia ngena kayu dikena ngetanka rumah nya ngambika enda runtuh agi.
“Aku arap opis menteri tauka KPM ulih ngagihka belanja ungkup dikena ngaga tauka meli baru ramu rumah pengajar nya enggau naka pengelengkas,” ku Ugak.