NGEMERANKA PENGAWA ASAL: Alexander (empat kiba) benung kiruh ‘miring’ di SK Peraran sebedau ngenukuka semua atur pengawa.
Peranak menua pesisir lebih agi tuai rumah patut ngelala penyiru perintah BN ke seruran deka nyaup rayat
KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi ngelalau semua Tuai Rumah (TR) nyeliahka diri mantai penemu enti nadai chukup penerang.
“Kitai ke nguan menua pesisir lebih agi tuai rumah nemu sapa ke meri projek pemansang sereta penyampau ke diberi. Aku nyebut tu laban bisi sekeda orang nyengkaum tuai rumah mantaika penerang ke tau ngasuh runding kusut,” ku iya.
“Bisi orang semina nyaup peranak rumah panjai mimit tang nerima puji ngelui pengamat baka ke suah dipenggai pengari perintah Barisan Nasional.
Ambi ke banding, Gani, Pulau Pisang,ke udah nerima urung RM140,000 geran ari perintah BN nyengkaum ungkus ngerata taba endur sida berumah sereta bantu bukai. Enda patut saup mimit ari sekeda orang ulih ngelindung bantu ke besai ari perintah?,” ku Nanta nyerumba atur pengawa bejadika jematan besi ke berega RM80,000 di SK Peraran ditu kilah ensana.
Iya mega minta peranak menua dia ngelala penatai duit dikena ngemujurka projek ke dipejalai di menua sida.
Seraya nyebut projek Pala Wong iya madah, RM2 miliun udah diungkup kena ngemujurka projek ba kandang menua nya. Penyampau nya enda nyengkaum bantu belanja ari Opis Residen enggau Opis Pelilih Mit menua
“Kelimpah ari nya, semua belanja sereta penyampau duit Komiti Pemansang enggau Pengelikun Genturung Pendiau ke dikena, enda tau enda diterang ngagai mensia mayuh,” ku iya seraya madah, ulah ke deka ngelalai penerang tau ngujungka kitai nerima petenah sereta ngasuh orang bukai ensiban ati.
Iya ngarapka Sabah enggau Sarawak pia mega sitak ke dipegai iya deka dikemerat lebuh bejuraika Perambu Belanja ke deka dibantaika Menteri Besai bulan baru tu ila.
Bela bisi nyempulang iya ba atur pengawa nya, SAO Keron Mapus ari Opis Pelilih Mit Kapit, Kepala Opis Pengerara Api enggau Penyah Penusah Kapit Erwandy Bin Tugor, Senior Supervisor Pemansang Raban Bansa Kapit Ambrose Abong Bugek, Kareno Lampong pengari Opis Pelajar, Pemesai JASA Kanchin Manggom sereta ketuai opis perintah bukai.
Penatai Nanta mega dikelaluka Kepala Pengajar sekula nya Saging, kaban Serakup Apai Indai enggau Pengajar, raban pengajar enggau nembiak SK Peraran.