Bisi peneleba sereta landik bejaku bansa bukai mega patut dikemerat

0

KUCHING: Kelimpah ari pelajar akademik ti dipelajar di sekula, ngulihka penemu sereta peneleba di luar sekula mega patut dikemerat.

Kepala Sekretari Politik Opis Kepala Menteri Abdullah Saidol madah, taja pan teulihka pemujur akademik ke tinggi, tang enti nadai pengandal ati ba diri empu, kitai deka betapi enggau penguji lebuh masuk universiti tauka udah pansut ari universiti.

Iya madah baka nya lebuh bejaku nutup ‘Program Kesedaran Industri’, ngarika Menteri Muda Pengatur Pemansang enggau Pemeranak Puku, Datuk Julaihi Nahrawi, ti diatur Unit Tenaga Kerja, Opis Kepala Menteri enggau PUSTAKA di Auditorium Pustaka Negeri Sarawak.

Bisi 160 iku nembiak ari lapan buah sekula sitak Petra Jaya bisi dikangau mendingka bengkel empat hari berunggu nya ke berengkah ari 24 Sept tu tadi.

Kelimpah ari nya, Abdullah madah penemu belajar jaku bansa bukai baka jaku English, Mandarin, French enggau sekeda jaku bukai mega patut dikemeratka.

Ku iya, di Sarawak, berindik ari penumbuh SCORE deka nyendiaka urung 1.6 juta pengawa begunaka orang gawa ke landik ngena jaku bansa bukai laban pemayuh bansa pengawa bekaul enggau teknikal iya nya ngena jaku English.

“Jaku Bansa sama dikemerat baka kitai belajarka jaku bansa bukai kelebih agi jaku English. Lebuh kitai bisi pegelandik teknikal, lalu nemu bakani deka mutarka penanggul, maya nya beguna endar kitai ngena jaku English nerang ngagai raban orang ke betanamka puku ke datai kitu.

Dalam ngangkatka pengawa latih teknikal, iya madah, anang semina beratika penemu teknikal aja deka ngaga kitai nyadi injinir, tang penemu teknikal nya mega meri ‘bonus’ ngagai pengelandik kitai taja pan kitai nyadi luyar tauka akauntan, ku iya.

“Dalam dunya globalisasi diatu, penemu tauka pengelandik kitai dalam pekara bukai sama meri penguntung ngagai peneleba kitai,” ku iya.

Ba pekara nya mega, Abdullah ti mega nyadi Sekretari Ekonomi Gegasan Anak Sarawak (TEGAS) madah, diatu, perintah menua udah numbuhka TEGAS kena ngangkatka pengawa latih ti bekaul enggau teknikal.

Kelimpah ari nya mega, perintah besai bedau lama tu tadi, bisi numbuhka Pelin Pemansang Pelajar Malaysia (PPPM) kena nyikap diri nyadi sebuah menua industri ti ngemeratka pengelandik teknikal kelimpah ari penemu dalam akademik sekula.

Sama bisi datai Direktor Unit Tenaga Kerja Opis Kepala Menteri, Dr Abdul Rahman Deen enggau Ketuai Pegawai Eksekutif PUSTAKA, Rashidah Bolhassan.