MIRI: Suruhanjaya Perkhidmatan Awam (SPA) patut ngagihka kuota ke chukup ngagai rayat di Sabah enggau Sarawak diambi gawa ba opis perintah.
Seiku ari orang ke bisi minta ba SPA madah, iya ka pan enda nganti urung lapan taun ungkup ngisi pangku pengawa dalam opis perintah tang peminta iya nya nadai sesekali nguntungka iya.
“Aku bisi setipikit sereta ngembuan tikas pengelandik nitihka pinta dalam ‘online’ SPA sekumbang lapan taun ke udah, tang nyentuk ke sehari tu aku nadai nerima sebarang timbal,” ku iya mansutka penemu diri ngagai pemberita.
Iya madah, SPA baka ke bechiping ba pengawa ngagihka peluang gawa kelebih agi ba pekara bisi serekat kuota penatai pengereja pengawa baru ari Sabah enggau Sarawak.
“Diatu, mayuh amat sida ngembuan diploma enggau ijazah dalam mayuh bidang, tang ketegal peluang pengawa ke bisi serekat, sida nadai kereja tauka gawa nyambil,” ku terang iya ke enggai dipadah nama.
Berebak enggau tu mega, iya nganggapka sistem peminta ngena chara ‘online’ enda engkeman laban ukai diserenih sechara profesyenal ulih panel ke patut.
“Enti bisi pangku pengawa puang, semina beberapa iku aja chalun dikangau taja pan penyampau ke minta pangku pengawa nya mayuh.
“Aku ngarapka SPA enda bechiping dalam atur milih pengereja pengawa kelebih agi meri awak ke sebaka bela ngagai rayat Sabah enggau Sarawak gawa dalam opis perintah,” ku iya.
Bekenangka pekara ke sama, SPA enti nitih patut pechayaka rayat Sabah enggau Sarawak nya empu mangku pengawa dalam opis perintah.
“Ukai bereti rayat Sabah enggau Sarawak enda layak, tang sida iya ke bendar nadai diberi awak mangku pengawa ke lebih tinggi,” ku iya.
Chairman SPA Tan Sri Mahmood Adam maya ke mansutka penerang ensana madah, SPA nerima lebih dua juta peminta dikena ngisi mayuh pangku pengawa perintah.
Ari penyampau nya, bisi 1.62 juta peminta diterima ari bansa Melayu, Bumiputera Sabah (137,562), Bumiputera Sarawak (103,410), India (69,865), China (40, 892) enggau laluh bansa bukai.