Kemayuhka buah enggau sayur dalam pemakai, ku Prof Andrew

0

KUCHING: Penyakit riman ulih seliah genap iku kitai bepelasarka chara ngubah enggau gaya pemakai ti diempa ninting hari.

Entara chara, kurangka agi makai dagin enggau ikan tang kemayuhka buah enggau sayur, panyakit tu ulih diseliah.

Nitih penerang ari Sekretari, Malaysian Anti-Cancer Association (MACA), Prof. Dr. Andrew Tiong (gambar) lebuh dikerandau ba sebengkah aum pengarang berita madah, gaya pengidup ti bepengerai bepanggai ba bansa pemakai ti diempa.

Belalauka pengerai iya, Dr. Andrew, 72, madah, pakai mayuh buah enggau sayur dikena nyaga pengerai, lebih agi nyeliahka penyakit riman.

“Chara makai tauka pemakai ti diempa ninting hari enda tau enda dijaga, dikena nyaga pengerai diri, aku empu ngemeranka mayuh makai buah enggau sayur sereta enda makai dagin nyengkaum ikan. Seharitu tubuh aku agi bepengerai.

“Ambika banding orang indu ulih nagang tauka nyeliahka diri ari penyakit riman tusu enti sida ngemeratka bansa pemakai tauka ngirup jus buah nanas, madu enggau lia dipegulai lalu dikisar, udah nya terus diirup.

“Kelimpah ari nya, amat ngasi dikena nyeliahka penyaklit riman iya ngemeratka COATS iya nya lubak merah (carrot), orange, epal, tomato enggau buah belimbing dipegulai lalu dikisar udah nya diirup ninting hari entara pukul 5.00 ngagai 7.00 lemai, lalu tau ditambah herba Sabah Snake Grass enti bisi,” ku iya ti nyadi lecturer ba sebengkah universiti bekunsi enggau pengarang berita kemari.

Iya ti ngemeratka pemakai bansa sayur pengelama 26 taun madah, mayuh pemakai ti nyamai diempa tang nya tau ngeruga pengerai enti nadai besekat.

Ikan ngembuan asid urik ti urung 12 gram, tang tubuh kitai mensia ulih nerima enda ngeluai ari 4 gram asid nya, ke enda ulih diterima tubuh nya tau ngeruga pengerai, ku iya.

Orang ti kena penyakit riman ku iya patut chakah nyaga pengerai enggau pemakai diri iya nya lebih ngagai makai buah enggau sayur ti patut.

“Orang ti betapi enggau penyakit riman anang makai buah rian enggau coklat, laban nya enda manahka ke sel riman,” ku iya.