Azam Kerja nerima sambut kedua pemadu mana

0

KUCHING: Opis Menteri Pengintu Pengelantang, Orang Indu enggau Pemansang Ruang Bilik ti nyaga Program 1AZAM (Akhiri Zaman Miskin) madahka Azam Kerja kedua pemadu mayuh dipilih bala pesereta nangkanka Azam Tani.

Menteri iya, Datuk Fatimah Abdullah madah, nya nunjukka isu pengurang enggau semun diterima pesereta nadai agi nyadi di Sarawak.

Iya madah, Jabatan Tenaga Kerja (JTK) udah bejalaika inisiatif dikena betapi enggau penanggul nya (Azam Kerja kurang pesereta).

Ari penyampau tagit 7,500 iku pesereta program 1AZAM taun 2013 ku iya, bisi 5,070 iku pesereta nengah projek Azam Kerja, Azam Tani, Azam Khidmat enggau Azam Niaga.

“Bepelasarka statistik pesereta program 1AZAM taun tu, penyampau pesereta Azam Tani bisi 3,236 iku, lalu ditangkanka enggau Azam Kerja (767 iku pesereta), Azam Niaga (534 iku pesereta) enggau Azam Khidmat bisi 533 iku pesereta, lalu penyampau semua nangka 9 Oktober 2013 bisi 5,070 iku pesereta (1AZAM).

“Berindik ari nya, nadai agi isu bekaul enggau Azam Kerja (kurang pesereta) laban sida JTK bisi inisiatif bejalaika nya.

“Pesereta mayuh agi milih Azam Tani laban sida ke patut nyereta program nya endang di kandang menua pesisir ti tebal agi orang betanam betupi,” ku iya madah ngagai Utusan Borneo lebuh ditanya bekaul enggau isu pengurang pesereta Azam Kerja.

Dalam surat berita apin lama madahka projek Azam Kerja mandangka pengurang sereta semun diterima pesereta 1Azam di Sarawak.

Nitihku penerang ari Penyelaras e-Kasih Pelilih Mit Samarahan Benjamin Wing David Uking, madahka tebal agi pesereta milih projek Azam Niaga, Azam Tani enggau Azam Khidmat.

“Azam Kerja iya nya projek 1Azam ti pemadu enda tebilang di Sarawak nyengkaum di Sabah enti dibandingka enggau di Semenanjung Malaysia ti diterima manah ulih pesereta nya.