UDAH DIPENYADI: Alexander bejadika lumba antara rumah SK Nanga Ngungun diperati Jelani (kiba ), Berita (dua kiba ) enggau ke bukai .
Balai mayuhguna disadang tembu dalam kandang tiga bulan sereta gelanggang takraw deka diatap
KANOWIT: Sekula Primari (SK) Nanga Ngungun di Sungai Ngemah, bisi sebuah sebuah Balai Mayuhguna ke deka tembu digaga taun baru.
Kaban Kunsil Nengeri Ngemah, Alexander Vincent madahka balai ke benung digaga diatu nya disadang tembu gaga dalam kandang tiga bulan agi.
Ku iya, gelanggang endur bemain takraw ba sekula nya deka diatap lalu digaga nyadi balai mayuhguna.
“Tu berita ke manah ngagai raban sekula nya laban perengkaguna ke baru tu mega deka nyadi palan ke manah endur baum sereta bejalaika pengawa bukai, taja pan enti semaka maya nya hari ujan,” pia ku iya sebedau bejadika projek nya kena Hari Empat minggu nyin tadi.
Ku iya baru, projek nya digaga ngena ungkus RM25,000.
Sama bisi ngulu pengerami nya, Kepala Pengajar SK Nanga Ngungun, Bundong Nibong, Chairman Gerempung Apai Indai enggau Pengajar,Lakun Laga, Pemesai Opis JASA Ngemah,Jelani Ajang enggau pengari ari Opis Pelajar Pelilih Mit Kanowit, Berita Sabang.
Beserimbai enggau nya, Alexander lalu bejadika pekit lumba darat entara rumah sekula nya sereta lalu nyuaka Netbook 1Malaysia ngagai 46 iku nembiak Primari Enam.
Urung 80 iku nembiak ari sekula bisi ngarika rumah lumba iya nya Rumah Kenyalang, Rumah Rajawali, Rumah Merpati enggau Rumah Helang ba mayuh bengkah pekit lumba ke diatur sehari nya.
Ba ujung lumba nya, Rumah Kenyalang udah nyadi champian ditangkanka Rumah Rajawali, Rumah Helang enggau Rumah Merpati.
George Len Luat enggau Christina Rina Juni udah dipilih nyadi atlet ke pemadu nyulut ungkup bagi indu engggau lelaki.