KUCHING: Gaya pendiau sereta tempat ngelingi pendiau orang nya nyadi sekeda kebuah orang betapi enggau sakit untak, ku Menteri Muda Pengerai Mensia Mayuh, Datuk Dr Jerip Susil.
Jerip lebuh bejaku di atur pengawa makai lemai beserimbai enggau Hari Pengerai Sedunya bedau lama tu tadi madah, chara nyaga pengerai ukai semina mungkur selangkuh tubuh aja, tang mega nyengkaum untak, lalu ukai semina digaga ulih orang selama tang pegawai perubat sereta pakar sakit untak.
“Pengerami nyambut Hari Pengerai Untak Sedunya setipak endar lalu patut diintu raban opis pengerai enggau pakar sakit untak, dalam pengawa sida iya meri penemu pasal pemesai guna nyaga pengerai untak ari nyadi,” ku iya.
Berindik ari nya, Jerip ti mega seiku lutur ngelalau raban opis pengerai Sepital Sentosa ngaul sida ke sakit untak di sepital nya, lebuh ngereja pengawa sida iya, ngambika betatika chara pendiau ke bepengerai.
Iya madah, entara atur ke tau digaga, iya nya sama ngaul sereta sama sereta masuk program pengerai baka kimpin seribu singkang ti diatur ulih ijinsi opis perintah.
Dr Jerip madah, jaku rambai ke dikena Hari Pengerai Untak Sedunya taun tu, iya nya ‘Be happy Grow Older Healthily” setipak endar laban iya meri penemu ngagai raban orang ke gawa ba opis pengerai sereta mensia mayuh pemesai guna nyaga pengerai berengkah ari umur biak ngambika ulih nyamin pengerai maya tuai ila.
“Iya mega ngemeratka pengelantang pendiau mensia mayuh dijaga sereta ngembuan runding ke menyana,” ku iya.
Beserimbai enggau atur pengawa makai lemai nya, Dr Jerip nyuaka bantu RM10,000 ngagai Gerempung Pengelantang Pendiau Hospital Sentosa ke baru dibuka kena 26 March 2012, ngambika bisi dikena gerempung nya bejalaika aktiviti sida iya.
Ba atur pengawa nya mega, Matron Jimen Rinyui ti mega nyadi Sapit Chairman gerempung nya, madah entara tuju ngatur pengawa makai lemai nya, laban deka ngumpul pan ke gerempung nya.
Sama bisi nguluka atur pengawa nya, Dr. Irena Michael ke ngarika Direktor Hospital Sentosa, Dr. Bawek enggau pemesai sepital nya.