BEDIRI NENGAH SEMENGAT PBB: Asfia (duduk muaka tiga ari kiba) mansutka penerang ngagai pemberita senentang atur bepilih sayap Pemuda enggau Indu PBB kemari.
Penambah nya ngambika semua raban bansa ke mit-mit mega bisi diarika dalam parti, ku Asfia
KUCHING: Pengawa ngerebut penuduk mandal ketuai enggau kaban kunsil tinggi Sayap Pemuda Parti Pesaka Bumiputera Bersatu (PBB) nyerumba konvesyen parti ke-13 mandangka mayuh chalun deka bediri minta pilih arika suah.
Chairman Komiti Pengawa Bepilih Konvensyen PBB Datuk Amar Mohd Asfia Awang Nassar madah 2 iti penuduk mandal ketuai iya nya siti ungkup sayap bumiputera enggau siti ungkup pesaka (Bidayuh/Orang Ulu) deka diperebut tujuh iku chalun.
“Mandal ketuai Pemuda Biak PBB nyendiakka 3 penuduk ke alai ungkup pesaka (Iban) dipangku Bell Bernard Aggan ti udah menang di pantai.
“Siti penuduk puang ungkup bumiputera deka diperebut empat iku chalun iya nya, Halmi Morsaili, Haidel Heli, Ripin Lamat enggau Abdul Aziz Adenan.
“Siti agi penuduk ti diungkup ngagai pesaka (Bidayuh/Orang Ulu) deka diperebut Dennis Ngau, Cr. Stanley Sila enggau Henry Kilah Talek,”ku iya.
Iya mansutka penerang tu ba sebengkah aum pengarang berita pengudah pengawa nyabut undi chalun ke bediri ba Indu Opis PBB, Jalai Bako ditu, kemari.
Kelimpah ari nya, Asfia mega netapka 14 bengkah penuduk Kaban Kunsil Tinggi Sayap Pemuda Biak PBB deka diperebut 38 iku chalun ke alai siti penuduk (ungkup Bidayuh) udah dipangku Miro anak Simuh, menang di pantai.
Ku iya, ungkup Kaban Kunsil Tinggi, sayap bumiputera diagihka lapan penuduk lalu deka dikerebut 17 chalun, sayap pesaka (Orang Ulu) diagihka siti penuduk lalu diperebut dua iku chalun, sayap pesaka (Iban) diagihka lima penuduk lalu diperebut 9 chalun.
Datuk Fadillah Yusuff ngenanka penuduk ketuai Pemuda PBB pengudah menang enda dilaban lalu pia mega enggau penuduk sapit ketuai ti dipangku Gerald Rentap Jabu.
Berindik enggau nya Asfia ngansak raban ti bediri sereta raban penyukung bepekit enggau semengat kerejasama ke tinggi.
“Kitai napi pengawa bepilih tu nengah semengat PBB. Pengeran raban ketuai ke bediri mandangka sida ngembuan runding ti deka ngenukuka parti mengkang tegap,” ku iya.
Pengawa bepilih deka diatur kena 18 Oktober 2013 di Palan Aum Borneo Kuching (BCCK).
Ba kaul ke sama, Asfia netapka semua penuduk dalam sayap Orang Indu PBB enda dipekit serak tu.
Ku iya, semua chalun ari renggat Ketuai Orang Indu nyentukka semua 15 penuduk Kaban Kunsil Tinggi udah diagih enggau manah lalu enda dilaban.
“Dato Sri Empiang Jabu mengkang nyadi ketuai lalu pia mega Datuk Fatimah Abdullah deka nyadi sapit ketuai.
“Empiang udah mujur ngaul raban dalam sayap Orang Indu PBB ke alai 3 penuduk naib ketuai enggau 15 penuduk kaban kunsil tinggi enda diperebut,’ku Asfia.