SRI AMAN: Mensia mayuh diperansang masuk Pekit Video beserimbai enggau pengerami nyambut Pesta Bena 2013 Sri Aman nengah Facebook Undi Like – Ke Pemadu Mayuh ila.
Pekit nya dibuka ngagai dua bengkah kategori, keterubah iya nya Journalism:Latih Lumba Perau, cherita pandak sentang sesebengkah pekara, aturchara, aktiviti ke mungkur semua pekara.
Kategori kedua Pekit Video nya sentang Benak enggau Batang Lupar ke dirikud bala penyereta ti nyeritaka sentang benak enggau Sungai Batang Lupar, pia ku sebengkah penerang ari media ensanus.
Ku iya, tiap iku penyereta enda tau enda bisi akaun Facebook, lalu pemanjai video ke dirikud nya semina dikemendarka urung dua ngagai lima minit aja sereta ulih didownload dalam group Pesta Benak di laman rama Facebook ba https://www. facebook.com/groups/ pesta benak.
Klik ba bagi add photo / video dalam group nya lalu download video kita. Format ngenamaka rikuding nya, baka ba chunto ke dibaruh ditu:
JOURNALISM – LATIH LUMBA PERAU
Video tu mandang penyereta pekit lumba perau ti benung belatih nyerumba Pesta Bena di Batang Lupar.
Nama Penyereta:
Lumur Kad Pengelala/Passport:
Rikuding video ti teulihka Like ke pemadu mayuh, deka nyadi pemenang. Raban pengatur pengawa tau muai sebarang rikuding ti negu sentang isu begedi/bejaika sesebengkah bansa, jalai pengarap enggau ngeruga penyamai ati orang bukai, ku iya.
Video ke dirikud dalam timpuh 1 Januari nyentuk ke 25 Oktober taun, ulih download kena masuk pekit nya laban timpuh ngemataka ‘Like’ pemadu mayuh deka tembu kena 30 Oktober, pukul 3 lemai.
Ku iya bala penyereta mega tau download rikuding video sida belabuh ari 17 Oktober tu dalam ‘group’ Pesta Bena, laban timpuh masuk pekit nya deka tutup kena 25 Oktober tu ila.
Champian pekit tu ba kededua kategori iya nya mata duit RM800 enggau setipikit, lumur dua mata duit RM 500 enggu setipikit lalu ke lumur tiga deka nerima mata duit RM300 enggau setipikit.
Pekit nya diatur Komiti Besai Pesta Bena Sri Aman 2013. Raban pengatur pekit tau nguna asil rikuding nya dikena ngelaku, dichelak enggau pekara ke bukai dalam media, sekali pan sida enda madahka ngagai penyereta ke beempu video nya, ku iya.