KAPIT: Perintah deka napi penanggul senentang pengawa meri projek nyengkaum geran projek menua pesisir (MRP) enti peranak rumah panjai udah belelang ngelengka ke menua.
Menteri Pemansang Tanah Tan Sri Datuk Amar James Masing madahka, pengawa belelang lalu ngentapka pendiau ba menua bukai manah enti ngena tuju ti betul.
“Perintah tusah deka meri projek ngagai sida ke belelang enda amat tu laban bisi nya minta projek ba rumah panjai tang mega sida bela minta projek ba menua alai sida belelang.
“Tang enti sida belelang lalu ngentap ba menua bukai lalu bulih pengidup ti lebih agi menyana ari ke udah, nya enda ngawa, endang diasuh rayat ngasaika pemansang ba pengidup,” pia ku iya madah.
Iya mantai pekara nya maya bejadika Pengerami Nutup Aum Besai Tuai Raban Bansa Sarawak 2013 ditu, lemai ensana.
Sama bela bisi datai maya tu iya nya Menteri Ba Opis Menteri Besai Datuk Joseph Entulu Belaun, Sapit Menteri Pemansang Menua Pesisir enggau Kandang Menua Datuk Alexander Nanta Linggi, Kaban Parlimen Ulu Rejang Tuan Wilson Ugak Kumbong, Chairman Komiti Pengatur Pengawa ti mega Pemesai Pelilih Menua Kapit Elvis Didit enggau bala pemesai ke bukai.
Masing madahka, pekara raban bansa Iban ke belelang tu patut dikerundingka lalu anang besui pangan diri.
“Kitai enda nyalah sida ke belelang tang kitai lebih agi raban pemesai patut begempung berundingka chara mutarka pekara tu.
“Nya alai, perintah nyengkaum opis menteri aku mayuh ngaga projek ke diatur ba menua pesisir baka projek Insitu Development ngambika peranak rumah panjai ulih ngidupka diri ba menua lebih agi sida ke belelang ti nadai mai pemujur ngagai diri empu,” ku iya madahka baru.
Tang ku iya ti mega Kaban Kunsil Nengeri Baleh, projek ke digaga perintah baka nanam sawit enggau getah ba menua pesisir semampai dikepapasaka orang bukai.
“Projek tu digaga kitai ngambika ulih nyungkakka pengidup rayat ba rumah panjai.
“Tang bisi orang ti kepapas semampai malut runding rayat madahka perintah deka ngambi tanah rayat.
“Ari nya kitai minta saup orang ke bisi pengelandik bela nerang ngagai rayat laban perintah nadai ati deka ngambi tanah rayat tang pungka deka ngemansangka pengidup rayat,” pia ku iya madah.
Berebak enggau nya mega, Masing madahka, sekumbang 50 udah meredeka, rayat ba menua tu udah jauh mansang nyengkaum ari pekara pelajar.
Ku iya, sebedau 50 taun tu nadai seiku bansa Iban bisi graduate tang diatu bansa Iban ngelui ari penyampau nya kelimpah udah mayuh bisi nyadi profesor.
“Reti nya, kitai udah bisi mansang sekumbang 50 taun tu.
“Pemansang tu ukai semina ba pelajar tang kitai temegah ati laban bansa kitai mega mansang ba pengidup,” ku iya madah.
Masing madahka, perintah mayuh nengkebang program dikena mantu nyungkakka pekara pelajar.
“Ambika banding baka Dayak Culture Foundation (DCF) enggau Tun Jugah Foundation bisi meri sekulasip dikena nyaup kitai bala apai indai nyengulaka anak.
“Tang sayau bendar mayuh sekulasip ke diungkup ngagai kitai di Sarawak enda dikena.
“Anang nyalahka orang bukai tang berunding nama kebuah pekara tu tau nyadi,” pia ku iya madahka baru.
Aum ti keterubah iya diatur tu belabuh ari 11 ngagai 13 Oktober berambaika leka jaku ‘Mansang Pegari’ bisi digulu lebih 100 iku raban tuai bansa Iban ari serata nengeri tu.
Ba aum tiga hari berunggu tu, bisi tiga pekara besai dipejurai.
Sebengkah ari nya pasal ‘The Philosophy, Principles And Factor Contributing To Rural-Urban Migration’ enggau ‘The Social-Economic Impacts Of Rural-Urban Migration On Iban Women And Youth’, pekara kedua ‘The Impact Of Rural-Urban Migration On Iban Culture And Tradition’ lalu pengujung bendar ‘Iban Community Leaders: Their Roles And Functions’.