Anjung anak nampung pelajar ba bidang teknikal

0

SIBU: Bala apai indai nadai mayuh chara bukai kelimpah nganjung anak sida nampung pelajar ba bidang teknikal seririh enggau pemansang nengeri tu maya dia.

Sekretari Politik Menteri Besai Mejar Peter Runin madah, diatu mayuh kompeni besai bekenaka raban pengereja pengawa ti ngembuan pengelandik teknikal.

“Ari Projek Kuasa Tau Dikena Baru Sarawak (SCORE), nengeri tu randaka rayat kelebih agi raban nembiak ngisi pengawa puang ke diadang bisi semilliun iti,” ku iya.

Iya mantaika jaku nya maya ngarika Menteri Penguasa, Pemayuh Tubuh enggau Pengereja Pengawa Datuk Richard Riot Daem bejadika Pengerami Makai Lemai Gerempung Ex-Soldadu Malaysia Pampang Sarawak begulai enggau Sarakup Bansa Dayak Sarawak (SDNU) Pampang Rajang ba sebengkah hotel ditu, lemai ensana.

Pengerami tu bela bisi digulu Kaban Kunsil Nengeri (ADUN) Ngemah Alexander Vincent, Penglima Briged Kesembilan Infantri Malaysia Brigadier General Muhammad Daniel@ Damien, Chairman SDNU Pampang Rajang ti mega chairman komiti pengerami Mejar Moses Ripai, Chairman PBTM Pampang Sarawak Spencer Birai enggau Chairman Opis Kunsil Menua Pesisir Sibu Kunsilor James Laju.

Peter ti mega Penyanding Penemu PBTM Pampang Sarawak, madah, taja pan baka nya, tu ukai mandangka bala apai indai natak diri bebendar nyengulaka anak nyentuk ke ba tikas pelajar pemadu tinggi.

“Taja kitai suah ninga bala pemesai ngelalau ngambika nganjung anak nampung pelajar ba bidang teknikal tang tu ukai ngasuh kita ke apai indai nekat diri nganjung anak ngagai tikas ke tinggi agi.

“Tang kebendar iya enti kitai bisi anak ke mekang-mekang pelajar, sida tau dianjung nampung pelajar ba bidang teknikal seririh enggau tuju perintah ngemansangka nengeri nengah SCORE,” ku iya.

Peter mega maya tu ngumbuk bala raban PBTM ngambika berunding baka ni chara besemekih enggau orang bukai ti udah lantang pengidup.

Ku iya, tebal agi raban PBTM datai ari rumah panjai tauka menua pesisir ti nadai ngembuan penatai pemisi ti tetap.

“Mayuh agi raban kitai idup ba baruh tikas seranta.

“Nya alai, kelimpah ngarapka penusah kitai tu diperening perintah, aku ngarapka kitai ulih besemekih enggau orang ti udah lantang pengidup nyerumba ubah ke bisi nyadi kemaya hari tu,” ku iya.

Dulu ari nya, Spencer ba jaku iya madah, PBTM Pampang Sarawak deka ngatur macham bengkah program kena 23 November ti deka datai ba Padang Merdeka di Kuching.

Program nya ku iya dikena ngiga belanja ungkup Tabung Bujang Berani sida.

“Sekeda ari program ke bisi diatur kitai iya nya baka jogerthon, mandangka kereban soldadu enggau kapal perang kelimpah ngatur pekit ‘parachute’.