Enda semina ngemeratka pemansang ekonomi tang aruh mekuh pekara rama
KUCHING: Parti Pesaka Bumiputera Bersatu (PBB) diatu patut mekuh ngagai pekara rama kelimpah ari ti semina ngemeratka pekara ekonomi.
Presiden PBB ti mega Kepala Menteri, Pehin Sri Abdul Taib Mahmud madah, nya dikena betapi enggau sebarang penguji ti dipelaba deka nyadi jemah ila.
“Enti ngelama tu kitai selalu bejaku pasal penanggul ekonomi tang diatu aku deka meda semua kaban parti meri mayuh agi awak ngagai pekara rama. Tu nundaka pekara ti dipelabaka deka nyadi.
“Perintah menua mega patut mayuh agi berandauka pasal pekara rama ngambika iya datai nengah chara ti engkeman lalu ukai semina ngena chara orang seseiku.
“Enti ulih diatur enggau betul, aku melabaka mayuh agi penemu manah deka pansut lalu perintah deka bulih penerang pasal penanggul ti ditapi ulih raban mensia ti dikumbai aku raban mensia industri (industrial society),” ku iya lebuh dikerandau pengarang berita ditu kemari.
Dulu ari nya Taib bejadika Aum Besai Ke-13 Raban Nembiak enggau Orang Indu PBB ti diatur ba Borneo Convention Centre Kuching (BCCK) ditu, kemari.
Lebuh bejaku ba pengerami nya Taib mega madah, PBB ukai semina berundingka pasal ekonomi aja tang patut berundingka pekara ke nyadi dalam raban bansa kitai.
Orang tuai baka aku enda ulih bejalaika pengawa nya tang orang ti tegap enggau kering iya nya raban nembiak PBB ulih ngereja nya, ku iya.
Kelimpah ari nya Taib madah, orang indu kemaya hari tu rindu deka bedagang sereta pekara nya patut dikerandau enggau unit ti bekaul ngambika ulih ngiga peluang dagang ti engkeman.
Ku iya, pekara tu patut dikerandauka sida Biro Orang Indu enggau unit ti meransang orang dagang mit.
“Orang indu begulai enggau unit ti bekaul patut ngiga nama pengawa dagang ti bisi peluang dikerembai, ngambika kitai ulih melanja program orang indu nengah lalau ari raban orang indu nengah PBB,” ku iya seraya madah laban deka bedagang kitai patut ulih meretika peluang nyual asil dulu.
Berebak enggau nya Taib meransang raban nembiak enggau orang indu nyikap diri napi ubah ti majak nyadi.
Aum Besai Ke-13 Parti Pesaka Bumiputera Bersatu ti berambaika leka jaku ‘50 Tahun Kegemilanagn Lonjak Perjuangan Kita Ke Hadapan’ diatur berengkah kemari nyentuk ke 22 Oktober ba BCCK, lalu deka dipenyadika Menteri Besai Datuk Seri Najib Tun Razak kena 21 Oktober.
Sama bisi ba pengerami nya kemari, bini Taib, Puan Sri Ragad Kurdi Taib; Ketuai Raban Nembiak Datuk Fadillah Yusuf, Ketuai Raban Orang Indu Dato Sri Empiang Jabu; Sapit Kepala Menteri ti mega Sapit Presiden Datuk Patinggi Tan Sri Alfred Jabu Numpang; Menteri Pengawa Berumah enggau Dagang Temuai ti mega Sapit Presiden Datuk Amar Abang Johari Tun Openg; Menteri Pemansang Industri ti mega Naib Presiden Kanan Datuk Amar Awang Tengah Ali Hasan enggau kebukai.