KAPIT: Peranak pelilih mit diatu bisi pilih bukai enti deka ke Sibu nguna bot ekspress laban pelilih mit menua nya udah bisi bot ekspress ke diri empu ti diberi nama SONG BOLEH. Bot eskpress nya enggi beberapa iku orang ari menua nya dikena napi peminta perengka pengangkut mensia mayuh ke mangkang menua dia.
Sebedau bot ekspress nya berengkah dikena, peranak menua Song numpang bot eskpress ari Kapit enti sida deka ke Sibu tauka ari Sibu ke Kapit. Tang diatu sida tau numpang eskpress Song Boleh terus ke Sibu sereta ngemuntangka pejalai sida.
Ku seiku ari orang ke beempu ekpress nya ke benama Chan, bot ekspress nya udah belabuh beoperasi lebih ari seminggu, pulai mansang ke Sibu ninting hari.
Ku iya, bot ekspress nya bekejang ari Song ke Sibu pukul 8:30 pagi sereta nikal baru ari Sibu ke Song pukul 12:30 tengahari. Servis bot ekspress nya mega mantu ngurangka penyekut ba bot ekspress ke bukai. Pejalai ari Song ke Sibu ngelama dua jam.
Sebedau tu, Song kala bisi servis bot ekspress, tang diketuka dalam kandang beberapa taun ke udah.