Tuesday, November 19

DNC berepakka singkang kaki Dayak enggau bansa bukai

0

Kongress tu bekunda ngenukuka hak semua bansa Dayak di Malaysia diintu enggau menuku: Mengga

KUCHING: Dayak National Congress (DNC) angkun nentuka raban bansa Dayak di Sarawak, Sabah enggau Malaya tetitihka singkang bansa bukai di udah jauh mansang.

Bejaku ngagai pemberita pengudah ngulu aum keterubah DNC, Presiden Mengga anak Mikui madah gerempung nya deka ngemeratka pemansang dalam pekara pelajar, ekonomi enggau pemansang modal mensia ungkup bansa Dayak.

“Kitai Dayak mengkang jauh tinggal ari bansa bukai kelebih agi ba pekara pelajar, ekonomi enggau pemansang modal mensia. Kitai bisi mayuh gerempung ke ukai dikuasa perintah (NGO), DBNA ngarika bansa Bidayuh, SADIA ngarika Iban lalu DNC deka ngarika semua Dayak di menua tu.

“DNC deka nyadi siti gerempung alai raban bansa Dayak di Sarawak, Sabah enggau Malaya ngangkatka diri ba ketetiga pekara nya ngambika ulih tetitihka singkang bansa bukai,” ku iya.

Tuju DNC ti mujur ditumbuhka ba bulan Jun 2013 iya nya nentuka hak semua bansa Dayak baikka nya di Sarawak, Sabah enggau di Malaya (iya nya bansa Dayak ti gawa di Semenanjung Malaysia) diintu manah, tandu iya.

Taja pia, iya nambah DNC enda sekali deka melakangka adat enggau main asal ke nyadi kelai bansa Dayak.

“DNC deka ngatur kaul enggau bansa Dayak ba mayuh bengkah pekara kelebih ba pengawa ti tau mulaika pemaik enggau pemansang lalu nya  nyengkaum pengawa ngemansang tanah adat bansa asal (NCR),” ku iya seraya ti madah nya entara sekeda program ti diatur ngambika tau nyapai juluk ti ditetap DNC.

Bela datai Sapit Presiden Datuk John Tenewi Nuek, Sekretari Besai Richard Lias enggau komiti gerempung ke bukai.