Pelajar disemaka baka kunchi pengidup

0

MIRI: Pemansang raban bansa kitai bepanggai ba tikas pemujur ba pelajar sekula.

Raban bansa nadai penanggul malutka diri ba semua bidang nyengkaum bidang ekonomi enti ngembuan pelajar sekula ke manah.

Reti nya, apai indai patut bejalaika tanggungpengawa sida sereta ngembuan pengelandik ngiring sereta meransang anak sida ngambika nyulut ba pelajar sekula kena nambahka pengelandik sereta penemu sentang chara meransang anak ba pelajar, apai indai patut ngulu seminar apai indai ke deka diatur kena 26 Oktober tu ila.

Licha ngelama enam jam nya deka diatur ba SK Senadin Miri, berengkah ari pukul 7 pagi.

Seminar tu diatur begulai Gerempung Apai Indai enggau Pengajar (PIBG) SK Senadin Miri, SK Lutong, SK Merbau enggau SK Tudan sereta disukung Gerempung Dayak Miri (DAM), kelebih agi ungkup apai indai bansa Iban ke agi nyengulaka anak.

Rambai jaku seminar ke sekali tu iya nya ‘Pemansang Enggau Penampak Bansa Bepun Ari Pemujur Pelajar’, deka nyadika pelasar endur bala apai indai begulai seraya bekunsika penemu enggau pangan diri sentang pemansang pelajar raban bansa ngambika sama nyingkang sebaka enggau bansa bukai.

“Apai indai ke bisi ati deka ngulu seminar tu tau ngerejister diri ba SK Senadin.

“Barang sapa ke diau ba kandang menua Miri tau ngerejister dulu kena nyeliahka penekul ke enda disadang tau nyadi ila,” pia ku pengajar Wilfred Mac.

Ku iya, anang enda nguna peluang tu laban mayuh macham topik ke memanah deka dibantai bala tukang licha ke mayuh peneleba sereta profesyenal maya nya ila .

Ku Wilfred, pelajar meh nyadika kunchi pemujur dalam pengidup laban pelajar ulih nyendiaka pelasar penemu lalu ngasuh seseiku nya ulih berunding enggau manah.

“Pelajar ulih ngangkatka tikas penegap runding sereta ngubah seseiku enggau komuniti ba mata semua,” ku iya.

Ku Wilfred baru, nembiak bansa Iban ke nyulut ba pemutus peresa UPSR, PMR, SPM enggau STPM deka diberi insentif ba ujung seminar nya ila.

Penerang ke silik agi sentang insentif nya tau ditanya ngagai Kitty Janggot ba opis DAM nengah lumur 085-435467 tauka Wilfred (013-8261997).