110 nembiak sekula, pengajar ngulu RIMUP di SK Tulai

0

BINTANGOR: Sepenyampau 110 iku nembiak enggau 30 iku pengajar ari tiga sekula primeri SK Tulai, SK Sungai Kawi, SJK (C) Yong Kwong enggau SJK (C) Tung Kwong ngulu Program Rancangan Intergrasi Murid Untuk Perpaduan (RIMUP), kemari.

Program ke diatur sehari ba SK Tulai nya berambaika jaku ‘Penghijauan Bumi’.

Kepala Pengajar SK Tulai Kuah Rames madah, program ke diatur sekula sida nya dikena nyaut juluk perintah ti deka nempa penyerakup entara bala nembiak pupu raban bansa.

Kelimpah ari nya ku iya, program tu dikena nerenakka ulah begempung enggau pangan diri, bekerejesama sereta besaup ngereja pengawa.

“Beserimbai enggau rambai jaku program kitai sehari tu, kitai ngarapka ulih ngembing bala nembiak sekula kelimpah raban pengajar rindu ngintu pemeresi enggau pemanah rampa menua,” ku iya madah ngagai pengarang berita.

Macham bengkah program nyempulang ke bukai bela bisi diatur maya nya baka nanam paung bungai, meresi kandang sekula enggau bala nembiak diberi awak bekelala enggau pangan diri ari sekula bukai.

Program tu mega bisi digulu Kepala Pengajar SK Sungai Kawi Abdul Latip Morshidi, pengari pengajar SJK (C) Yong Kwong Wong Sing Lou enggau pengajar pengajar SJK (C) Tung Kwong Wong Siew Ting.