KUCHING: Pemaju rumah tauka palan bebeli barang di nengeri tu dilalau ngemeratka langkar ti ngemeranka pengelantang rayat kelimpah ari pemanah, nyaga rampa menua enggau pengelikun raban bansa.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hasan madah, gaya rumah tauka palan bebeli barang patut inklusif ngambika meri penyenang enggau penyiru ngagai semua orang nyengkaum orang nyelai pendiau (OKU).
“Aku ngarapka pemaju ulih beratka pekara bekaul enggau rampa menua iya nya nanam mayuh agi utai tumbuh gadung ba kondominium (rumah/palan bebeli barang) ngambika ukai semina rumah konkrit aja.
“Aku mega ngelalau pemaju mayuh agi nguna belanja kelebih agi dikena nanam kayu enggau landskap ti meri pemanah ngagai raban bansa ari segi gaya angin tauka rampa menua ti manah.
“Taja pia, pemaju enda patut ngemeratka pemanah langkar, pemanah kandang tauka rampa enggau pengelikun raban bansa aja tang mega enda tau enda beratka pekara pengelantang rayat, nyengkaum orang nyelai pendiau (OKU),” ku iya ti nyadi Menteri Perengka Guna Mensia Mayuh seraya ngarapka pemaju iya nya Coramax Sdn Bhd ngemeratka semua pekara nya.
Iya ti nyadi Menteri Pemansang Industri mansutka pekara nya lebuh bejaku seraya bejadika Vivacity Megamall enggau Jazz Suites 4 ti diatur Coramax Sdn Bhd ba sebengkah hotel ditu, pagi kemari.
Ngenang penumbuh Vivacity Megamall enggau Jazz Suites 4, iya madahka Coramax Sdn Bhd ti nyadi pemaju nya udah nyendiaka mayuh pengawa puang ungkup peranak nengeri kelebih agi di mengeri Kuching.
Iya ngarapka nengah mayuh pemansang di nengeri tu ti ulih nyendiaka pengawa puang ungkup peranak menua ulih narit rayat Sarawak ti gawa di menua bukai pulai ngagai menua diri.
“Baka ti dipadahka sida Coramax Sdn Bhd ngagai aku, Vivacity Megamall nya nyendiaka urung 2,000 pengawa puang lalu tu mega amat beguna ngagai ekonomi kitai,” ku iya.
Malaysia tauka Sarawak betapi enggau pemayuh raban nembiak ti gawa ngagai menua bukai ketegal gaya gaji ti enda sebaka, ku iya.
“Tang nengah polisi perintah Barisan Nasional kitai numbuh tauka nyendiaka mayuh pengawa puang ti ulih mayar gaji besai, kitai ngarapka ulih mai pulai baru raban nembiak ti gawa di menua orang ke Sarawak sereta mantu ngemansangka nengeri,” ku iya.
Bela bisi ba pengerami nya kemari, Menteri Muda ba Opis Kepala Menteri ti mega Menteri Muda Pengatur Pemansang Pengeraja Asal Datuk Mohd Naroden Majais; Menteri Muda Pengatur Pemansang enggau Pemeranak Puku Datuk Julaihi Narawi, Datuk Bandar Majlis Bandaraya Kuching Selatan Datuk James Chan, Managing Director Coramax Sdn Bhd Sim Yaw Hang enggau ke bukai.