Vivacity Megamall palan bebeli barang pemadu besai di Sarawak

0

KUCHING: Vivacity Megamall ti diperambu tembu taun 2015 deka nyadi sebengkah palan bebeli barang ti pemadu besai di Sarawak.

Managing Director, Coramax Sdn Bhd, Sim Yaw Hang madah, nya juluk kompeni Coramax ti nyadi pemaju Vivacity Megamall.

“Kami Coramax ngembuan juluk deka nyadika Vivacity Megamall sebengkah palan bebeli barang ti pemadu besai di Sarawak, ti diperambu ulih tembu dalam suku ketiga taun 2015.

“Renggat keterubah ti udah digaga iya nya mungkur 820,000 kandang ke disuwa enggau 3,800 endur ngengkahka kerita. Renggat kedua dipelabaka deka tembu 18 bulan pengudah renggat keterubah tembu,” ku Sim seraya madahka Vivacity Megamall digaga ngemeratka rampa menua.

Sim mansutka pekara nya dalam jaku pengelalu maya bejadika Vivacity Megamall & Jazz Suites 4 ti diatur Coramax Sdn Bhd ba sebengkah hotel ditu kemari.

Vivacity Megamall & Jazz Suites 4 dipenyadi Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hasan.

Ngenang Vivacity Megamall, Sim madahka sida ngembuan urung 70 persin komitmen ari peruncit, lalu Perkson penyuwa pemadu besai Coramax Sdn Bhd.

Projek Vivacity dipejalaika sepemanjai Jalan Wan Alwi, Tabuan Jaya, ti digaga ba 18 ekar pemesai.

Nambahka nya lebuh ti ngenang Jazz Suites, iya madah, 70 persin udah dijual ti nyengkaum Jazz suites tauka Jazz 1, 2 enggau 3, lalu Jazz 4 bisi berengkah dijual seharitu (kemari).

Kelimpah ari nya, Datuk Bandar, Majlis Bandaraya Kuching Selatan, Datuk James Chan lebuh bejaku ba pengerami ti sama madah, Vivacity Megamall deka nyadi 1st integrated project di Kuching.

Chan madah, nya beduduk ari pemansang Vivacity nya ti nyengkaum kodominium, palan bebeli barang, hotel sereta endur diau.

“Aku ngarapka Vivacity Megamall deka terus nyungkak pengelantang pendiau peranak Kuching seraya nyukung pengawa perintah ke ngadaka palan ungkup peranak ditu diau enggau lantang,” ku Chan.