KUCHING: Sepenyampau RM210 juta ari RM500 juta ti diungkup kena ngaga Jalai Besai Pan-Borneo, deka dikena ngemanahka jalai ba kandang endur ti ditemu suah alai penusah bebadi sereta ti patut dikemanahka enggau naka penyampat.
Nitihku Menteri Kereja Raya, Datuk Fadillah Yusof, entara kandang endur ti dikemeratka iya nya Jalai Betong-Sri Aman,jalai kandang menua Selangau-Bintulu ti patut dikemanahka enggau naka penyampat.
Kelimpah ari nya ku iya, Jalai Kuching-Serian sepemanjai urung lima kilometer ti agi bisi siti arung jalai deka ditangkir dikena mutarka penanggul penyekut ba kandang endur nya.
“Ari RM500 juta, iya nya RM290 juta enti enda saru aku dikena nyambung projek ti endang udah bisi lalu RM210 juta ungkup projek baru ti nyengkaum nangkir jalai, ngemanjaika jalai ngambika bisi endur begelih sereta ngemanahka jalai ba endur ti suah alai bebadi.
“Tang, dikemekuhka kitai ngena ungkup belanja ke bisi iya nya dikena mutarka penanggul penyekut, dikemanah ngambika meri pengelantang enggau pengelikun ngagai penguna jalai raya enggau ngurangka penusah bebadi ba jalai alun,” ku iya.
Iya mansutka pekara nya lebuh dipinta meri penerang bekaul enggau bajet RM500 juta ke diungkupka ngagai projek Jalai Besai Pan-Borneo baka ti dibantai Menteri Besai Datuk Seri Najib Tun Razak.
Fadillah ti mega Kaban Parlimen Petra Jaya madahka, projek ngaga Jalai Besai Pan-Borneo nya deka dipejalaika bererenggat.
Iya madahka diri temegah ati ngagai Menteri Besai laban meri ungkup ti mayuh agi enti dibandingka enggau RM100 juta taun nyin kemari.
Lebuh ditanya sekalika ungkup belanja nya chukup, Fadillah madahka, nya diberi enggau meda gaya pekara ke bendar lebuh beratika penatai pemisi menua.
“Ba perati aku ungkup belanja ti diberi nya ulih dipejalaika enti diberi sereta sekali, enda ulih dipejalaika ketegal penyampau kontrektor, enggau pengurang ba kereban.
“Nya kebuah kitai minta nitihka pengulih dipejalaika enggau realistik nyengkaum ba belanja, teknikal enggau pengulih nengeri enggau menua kitai,” ku iya.
Fadillah mega madahka bajet nya ngena strategi bekenaka belanja ti manah ngambika ngurangka defisit menua.
“Taun baru kitai ngurangka ngagai 3.5 persin sereta baka nya mega ba taun ke bukai nyentuk bisi lebih ila.
“Pengawa bekenaka belanja tu patut ulih diperatika ngambika bajet ke sekali tu ukai semina ngamatka semaya tang mega meri pengelantang ngagai rayat,” ku iya.