SIBU: Bajet 2014 ti dipejuraika Menteri Besai, Datuk Seri Mohd Najib Tun Razak kilah ensanus sebengkah ari singkang ke berani ti dipejalaika iya enggau perintah.
Sekreteri Politik Kepala Menteri, Andrew Shilling Bangit madah, singkang berani ke diambi Menteri Besai nya beguna amat kena nyaup nyadi sebuah menua ke maju nyerumba taun 2020.
“Pengawa nyendiaka diri ke diambi Menteri Besai nya siti singkang berani kena nyaup menua nyapai juluk nyadi sebuah menua ke maju nyerumba taun 2020,” ku iya.
Ku Andrew, Bajet 2014 mandangka perintah Barisan Nasional (BN) amat ngemeratka semaya ke gaga sida maya Pengawa Bepilih Besai Ke-13 (PRU13) apin lama ke udah.
Ku iya, nya beguna amat kena nampung pengawa baka nyukat kelingi tanah NCR, ngaga Jalai Besai Pan Borneo, nambahka pemansang perengkaguna enggau projek utiliti di menua pesisir.
“Perintah mega nambahka penyampau duit Bantu Rakyat 1Malaysia (BR1M) baka ke udah disemaya, ngerembaika bungkur perengka penyambung internet di menua pesisir, pemansang betanam betupi enggau pelajar,” ku iya seraya mandangka pengaga ati sentang semua Bajet 2014 nya.
Chairman Gerempung Indai Tunggal Sarawak (PITSA) pampang Sibu, Rebecca Saliman bisi berasai asa ati mimit enggau pula Bajet 2014 laban raban indai indai tunggal enda diberi ungkup kediri.
“Aku ngarika raban indai tunggal di Sibu, bisi berasai asa ati laban nadai ungkup kediri diberi Menteri Besai ngagai indai tunggal dalam bajet tu,” ku iya.
Ku Rebecca, iya kala ngenataika peminta ngagai Menteri Besai nengah website ngambi enda ninggalka raban indai tunggal dalam bajet menua.
Taja pia, iya meri terima kasih laban perintah udah nambahka penyampau BR1M 3.0 ari RM500 ngagai RM650 ke ulih diterima raban indai tunggal.
“Kami mega gaga ati enggau bonus setengah bulan gaji enggau bayar RM250 ngagai pengereja pengawa perintah ke udah pinchin. Kami ulih ngena bantu meli kereban sekula bala anak ila,” ku Rebecca.
Seiku agi orang ke deriba becha, Abdul Rahman Adam, 68, madahka BR1M 3.0 ke ditambah nya ulih mantu raban orang ke bepenatai pemisi mit baka sida.
“Sebedau tu, mayuh rega barang niki ketegal rega minyak petrol enggau diesel ditiki. Penyampau BR1M ke ditambah nya ulih mantu ngelempungka tating pengidup kami,” ku iya.
Abdul Rahman mega arapka BR1M nya ulih diberi belama lalu penyampau iya pan ditambah belama ba taun bukai ke dudi ila.