NGEMERATKA GEMPUNG: Haji Udin, maya ngelalau semua peranak menua ba genturung pendiau Nyabor ngambika seruran ngemeratka pemujur BN ba genap pengawa bepilih.
SAUP NGEMUJURKA GENAP PENGAWA BEPILIH: Ari kiba- KK Bakihan Nani; Reduan Junaidi; Hj Udin Hj Ali; Penghulu Abu Samat Hj Jeli; KK Abg Ahmad Abg Ali ba atur pengawa besukurka pemujur BN ba sitak P205 Saratok maya PRU13 tu tadi.
LELANDIK: Seraban nembiak Tadika Kemas Kpg Gerigat, Nyabor, Kabong ti diketuaika pengajar sida Suriati Bte Adenan, mandangka pengelandik ba sebengkah tanda dikena menggal mensia mayuh.
PENGGI KITA: Hj Udin (dua ari kanan) nyuaka pemeri sagu ati ngagai nembiak Tadika Kemas Kpg Gerigat nyerumba atur pengawa seraya dikemataka Reduan Junaidi (kanan Hj Udin), KK Bakihan (kanan) sereta sida ke bukai.
Peranak menua ba genturung pendiau Nyabor enda patut bingkuk penemu lebuh nyukung pengari BN
SARATOK: Kaban Kaunsil Tinggi (MT) Parti Demokratik Progresif Sarawak (SPDP) Haji Udin bin Haji Ali nyemetak ngelalau peranak menua Nyabor ditu ngambika enda bingkuk penemu lebuh nyukung pengari Barisan Nasional (BN) maya pengawa bepilih nengeri (PRN) ti deka datai tu ila.
“Anang baka ke udah, sekeda kaban kitai ari parti komponen BN enda seperau enggau parti, nyeliahka tanggungpengawa sereta nyukung penyakal,” ku iya.
Iya ke ngarika presiden SPDP Tan Sri William Mawan Ikom, bejaku munyi tu ba sebengkah atur pengawa ‘Besukurka Pemujur Barisan Nasional’ maya pengawa bepilih besai ti ke-13 (PRU13) ba sitak parlimen Saratok apin lama ke udah, diatur Komiti Pemansang enggau Pengelikun Genturung Pendiau (JKKK) Kampung Nyabor ba Balai Raban Bansa ditu, kena 3 November 2013.
“Aku ngasaika pemar bejalaika pengawa maya nya, sehari tu, kitai begelumu ditu dikena kitai ngelai sereta besukurka pemujur presiden parti kitai Tan Sri William Mawan Ikom maya PRU13 tu tadi,” ku iya seraya meri besai terima kasih ngagai sukung peranak menua sitak Nyabor ba pengawa nya.
Berebak enggau nya, iya mega ngenataika pesan pengaga ati Mawan ke sukung sida.
“Menteri Pemansang Rama ke mega kaban kunsil nengeri (ADUN) sitak Pakan, Tan Sri William Mawan minta ampun ngagai kitai ditu laban enda ulih datai ketegal napi penanggul ke enda disadang,” ku iya seraya besemaya deka ngenataika semua peminta ari peranak menua genturung nya.
Kelimpah ari ngelalau semua peranak menua ngemeratka kerejasama, iya mega minta sida begempung napi sebarang penanggul ke dibantaika raban penyakal maya PRN ti deka datai tu ila.
“Urung dua taun ari diatu, maya pengawa bepilih nengeri tu ila, aku minta semua kitai, enda milih ari parti dalam komponen BN, kenegapka penyerakup dikena napi raban penyakal.
“Semua kaban parti dalam komponen BN patut besaup ngenukuka pemujur sebarang pengari ari parti ke nguasa perintah baka ke diatu,” tangkan iya.
Bela bisi ngulu atur pengawa nya, Mandal Presiden I Gerempung Bansa Dayak Sarawak (SDNU) Anthony Banyan; Ketuai Pemadah SDNU Ganchai; kaban komiti Kaunsil Pengereja Pengawa Perintah Malaysia Jackson Ding; chairman SPDP pampang Nyabor, Reduan Junaidi; Penghulu Abu Samat Hj Jeli; KK Kpg Nyabor Lama, Abg Ahmad Abg Ali; KK Kpg Nyabor Baru, Bakihan bn Nani sereta mensia mayuh.